చిన్న సినిమాలు అయినప్పటికీ ఎంతో వైవిధ్యమైన పాత్రలలో నటిస్తూ ప్రేక్షకుల మెప్పు పొందుతున్నాడు హీరో శ్రీవిష్ణు. స్నేహితుడైన నారా రోహిత్ సహాయంతో మంచి సినిమాలను ప్రేక్షకులకు అందిస్తూ గత సంవత్సరం నీది నాది ఒకే కథ, వీర భోగ వసంత రాయలు సినిమాలతో తన వైవిధ్యతను మరోసారి చాటుకున్నారు.
‘చలనమే చిత్రము - చిత్రమే చలనము’ అనేది క్యాప్షన్‌తో ‘బ్రోచేవారెవరురా’ సినిమా త్వరలో ప్రేక్షకుల ముందుకు రానుంది. ఇందులో శ్రీవిష్ణు, ప్రియదర్శి, రాహుల్ రామకృష్ణ ప్రధాన పాత్రలు పోషిస్తుండగా నివేదా థామస్ హీరోయిన్‌గా నటిస్తున్నారు.
వివేక్ ఆత్రేయ డైరెక్ట్ చేస్తున్న ఈ సినిమా ఫస్ట్ లుక్ పోస్టర్ విడుదల చేయగానే ప్రేక్షకులను చాలా బాగా ఆకట్టుకుంది. దాన్ని డిజైన్ చేసిన విధానం, ఇల్లస్ట్రేషన్, అందులో పాత స్కూటర్‌పై పాతకాలం నాటి దుస్తులలో శ్రీవిష్ణు, ప్రియదర్శి, రాహుల్ వస్తున్నట్లుగా ఉన్న వింటేజ్ లుక్ అదిరిపోయింది. టైటిల్ లోగోలో ‘మెన్ ఎట్ వర్క్’ అనే శీర్షికను కూడా జోడించారు.
