తాను బ్రాహ్మణకులంలో పుట్టినప్పటికీ దర్శకదిగ్గజం కె.బాలచందర్ వెండితెరకు పరిచయం చేశాక తాను అందరివాడినయ్యానని హీరో కమల్ హాసన్ చెప్పుకొచ్చారు. అందువల్ల 'నేనూ హిందువునే.. కానీ నన్ను హిందూ విరోధిగా చిత్రీకరిస్తున్నారు. హిందువుల్లో అతివాదం నాకు భయం కలిగించింది. ఆ తప్పును ఎత్తిచూపించడం తప్పెలా అవుతుంది. నన్ను నాస్తికుడు అన్నా ఒప్పుకోను. ఎందుకంటే అది ఆస్తికులు పెట్టిన పేరు' అంటూ ఆయన స్పష్టం చేశారు.
మంగళవారం తన జన్మదినోత్సవం సందర్భంగా కుమార్తె అక్షరాహాసన్‌తో కలిసి ఓ హోటల్లో కమల్ విలేఖరులతో మాట్లాడారు. ఇటీవల తాను చేసిన హిందూ తీవ్రవాదంపై ఆయన వివరణ ఇచ్చారు. పనిలోపనిగా రాజకీయ పార్టీ స్థాపనపై కూడా స్పష్టత ఇచ్చారు. ఏ మతమైనా హింసకు పాల్పడకూడదని, హిందూ తీవ్రవాదం అన్న పదం తాను వాడలేదని అన్నారు. కానీ, హిందూ విరోధిగా చిత్రీకరించేందుకు కుట్ర జరుగుతోందని మండిపడ్డారు.
రాజకీయ పార్టీ కార్యాచరణ సన్నాహాల్లోనే తాను ఉన్నానని, అది ఇప్పటికిప్పుడు సాధ్యమయ్యేది కాదని అన్నారు. 'నేను పుట్టడానికి గల కారణం నిరూపించుకోవాల్సిన సమయం వచ్చింది. సమాజంలో లోపం ఏమిటంటే... ఏం చెయ్యాలో అది చెయ్యడం లేదు. తప్పు చేసినవాళ్లని తప్పించకపోతే మంచి ఎలా జరుగుతుంది? నిజాయితీ గల అభ్యర్థులనే ఎంపిక చేస్తాను' అని అన్నారు. జనవరి తరువాత తన రాజకీయ కార్యాచరణను ఒక్కొక్కటిగా వెల్లడిస్తానని ఈ విశ్వనటుడు ప్రకటించారు.
