కడప : మున్సిప‌ల్ కార్పొరేషన్ కైవ‌శం చేసుకోవాల‌ని య‌త్నించిన టీడీపీ కడపలో మ‌రోసారి కంగుతింది. కడప కార్పొరేషన్ స్టాండింగ్ కమిటీ ఎన్నికల్లో టీడీపీ బొక్కబోర్లాపడింది. ఫిరాయింపు కార్పొరేటర్లను నమ్ముకుని బరిలో దిగి అప‌జ‌యాన్ని చ‌విచూసింది. స్టాండింగ్ కమిటీ ఎన్నికల్లో ఉన్న ఐదు స్థానాలను వైసీపీయే సొంతం చేసుకుంది. టీడీపీకి కడప కార్పొరేషన్లో 8 మంది సభ్యుల బలం ఉంది. టీడీపీ అధికారంలోకి రాగానే, విడతల వారీగా మరో 12 మంది వైసీపీ సభ్యులను ఆక‌ర్షించింది. దీంతో వైసీపీ బలం 30కి, టీడీపీ బలం 20కి చేరింది. ఈ ఊపులో త్వరలోనే కడప కార్పొరేషన్ కూడా కైవసం చేసుకుంటామని జిల్లా టీడీపీ అధ్యక్షుడు శ్రీనివాసులు రెడ్డి తొడ కొట్టారు.
ఈ నేపథ్యంలో స్టాండింగ్ కమిటీ ఎన్నికలు జరిగాయి. టీడీపీ నుంచి తొలుత ఐదుగురు బరిలో దిగగా, చివరి నిమిషంలో ఫిరాయింపు కార్పొరేటర్లకు నోటీసులు జారీ కావడంతో ఇద్దరిని మాత్రమే బరిలో దింపారు. వైసీపీ నుంచి ఐదు స్థానాలకు ఐదుగురు బరిలో దిగారు. తీరా ఓటింగ్ పూర్తయ్యాక చూస్తే టీడీపీకి ఊహించని షాక్ తగిలింది. ఫిరాయింపు కార్పొరేటర్లతో కలుపుకుంటే టీడీపీ బలం 20. కానీ టీడీపీ స్టాండింగ్ కమిటీ అభ్యర్థికి కేవలం 17 ఓట్లు ఒకరికి, 18 ఓట్లు మరొకరికి పడ్డాయి. ఆ మిగిలిన ముగ్గురు కార్పొరేటర్లు టీడీపీకి లోలోనే వెన్నుపోటు పొడిచారు.
కడప కార్పొరేషన్‌నే సొంతం చేసుకుంటామని చాలెంజ్ చేసిన టీడీపీ నేతలు ఇప్పుడు ఓటింగ్‌లో హ్యాండ్ ఇచ్చిన ఆ ముగ్గురు కార్పొరేటర్లు ఎవరన్న దానిపై ఆరా తీసుకునే పనిలో ఉన్నారు. ఫిరాయింపు కార్పొరేటర్లపై అనుమానం కలిగేలా టీడీపీ కార్పొరేటర్లే ముగ్గురు వైసీపీకి క్రాస్ ఓటింగ్ చేసినట్టు భావిస్తున్నారు. మొత్తం మీద 12 మంది ఫిరాయింపుదారులను తీసుకున్నప్పటికీ కడప కార్పొరేషన్లో టీడీపీ పట్టుసాధించలేక టీడీపీ బొక్కబోర్లాపడింది.
