టీడీపీ సర్కారులో అన్నీతానై ఉన్న మంత్రి నారాయణ ఓడిపోయారు. ఆయన కేవలం 1988 ఓట్ల తేడాతోనే ఓటమి పాలయ్యారు. మంత్రిగా ప్రతి నిమిషం ఎంతో బిజీగా ఉన్న నారాయణ నెల్లూరు పట్టణ అభివృద్ధి కోసం ఎంతగానో కృషి చేశారు. అన్ని రకాల అభివృద్ధి పనులు చేపట్టినప్పటికీ... నగర ప్రజలకు మాత్రం అందుబాటులో ఉండలేక పోయారు. ఫలితంగా ఆయన వైకాపా యువ అభ్యర్థి అనిల్ కుమార్ యాదవ్ చేతిలో ఓడిపోయారు. పి. నారాయణ ఓటమికి గల కారణాలను టీడీపీ శ్రేణులు ఇపుడు విశ్లేషిస్తున్నాయి.
మరోవైపు కొంత మంది స్థానిక నాయకులు నారాయణ చుట్టూ కోటరీగా చేరి ఆయన్ను ప్రజలకు దగ్గరయ్యే అవకాశం లేకుండా చేశారు. మంత్రి మంచి వాడే అయినా మనకు అందుబాటులో ఉండే వ్యక్తి కాదనే భావన సామాన్య ప్రజల్లో కలిగింది. ఇది కొంత ప్రతికూల ఫలితాలు చూపగా, మరోవైపు పక్కనే ఉండి వెన్నుపోటు పొడిచిన సొంత పార్టీ నాయకుల వల్ల నారాయణకు పెద్ద నష్టం జరిగిందని ప్రచారం.
పోలింగ్‌ రోజే ఆ విషయం స్పష్టంగా బయటపడింది. పోలింగ్‌ కేంద్రాల వద్ద వైసీపీ నాయకులు, కార్యకర్తలు అడుగుకు ఒకరు చొప్పున ఉంటే మెజారిటీ పోలింగ్‌ కేంద్రాల వద్ద టీడీపీ నాయకులు కాని, కార్యకర్తలు కాని కనిపించకపోవడమే దీనికి నిదర్శనం. ఒకవైపు ఫ్యాను గాలి, మరోవైపు వెన్నుపోట్ల కారణంగా భారీ మెజారిటీతో గెలుస్తాడని అంచనా వేసుకున్న నారాయణ స్వల్ప మెజారిటీతో ఓటమి చెందాల్సి వచ్చింది.
