వైకాపా అధినేత, మాజీ ముఖ్యమంత్రి వైఎస్ జగన్మోహన్ రెడ్డి బెయిల్‌ను రద్దు చేయాలంటూ సుప్రీంకోర్టులో దాఖలైన పిటిషన్‌పై మంగళవారం కీలక పరిణామం చోటు చేసుకుంది. ఈ పిటిషన్‌పై విచారణను డిసెంబరు 2వ తేదీకి వాయిదా వేసిన సుప్రీంకోర్టు ఆ రోజున ఈ కేసును లిస్ట్ చేయాలంటూ రిజిస్ట్రీని అదేశించింది.
జగన్ అక్రమాస్తుల కేసు వ్యవహారంలో మంజూరు చేసిన బెయిల్‌ను రద్దు చేయాలని కోరుతూ వైకాపా మాజీ ఎంపీ, ప్రస్తుత టీడీపీ ఎమ్మెల్యే రఘురామకృష్ణరాజు గతంలో పిటిషన్లు దాఖలు చేశారు. వీటిపై సుప్రీంకోర్టు ప్రధాన న్యాయమూర్తి సంజీవ్ ఖన్నా సారథ్యంలోని ధర్మాసనం ముందు విచారణకు రాగా వాటిని మరో బెంచ్‌కు మార్చింది.
జగన్ బెయిల్ రద్దు చేయాలని, విచారణను హైదరాబాద్‌ నుంచి మార్చాలని తెదేపా ఎమ్మెల్యే రఘురామకృష్ణరాజు గతంలో వేర్వేరుగా పిటిషన్లు దాఖలు చేసిన విషయం తెల్సిందే. దీనిపై సీజేఐ జస్టిస్‌ సంజీవ్ ఖన్నా ధర్మాసనం విచారణ జరిపి పిటిషన్లపై విచారణ బెంచ్‌ను మార్చింది. సీజేఐ ధర్మాసనంలో జస్టిస్‌ సంజయ్‌కుమార్‌ సభ్యుడిగా ఉన్నారు.
