దేశంలో కరోనా డేంజర్ బెల్స్ మోగిస్తోంది. చిన్న పిల్లలపై కరోనా తీవ్ర ప్రభావం చూపే దిశగా రూపం మార్చుకుంటోంది. ఉత్తరాఖండ్‌లో 10 రోజుల వ్యవధిలో 9 ఏళ్లలోపు వెయ్యి మంది చిన్నారులకు కరోనా సోకినట్లు ఓ సర్వేలో తేలింది. దీనిపై రాష్ట్ర ప్రభుత్వానికి సమాచారం కూడా అందింది. వీరిలో కొందరు హోం ఐసోలేషన్‌లో ఉండగా.. మరికొందరు చికిత్స కోసం ఆస్పత్రుల్లో చేరారు.
ఉత్తరాఖండ్‌ ప్రభుత్వం వెల్లడించిన వివరాల ప్రకారం.. ఏప్రిల్‌ 1 నుంచి 15 తేదీల మధ్య 2 వందల 64 మంది చిన్నారులు కరోనా బారిన పడ్డారు. క్రమంగా అది పెరుగుతూ వచ్చింది. ఏప్రిల్‌ 16 నుంచి 30 వరకు వెయ్యి 53 మందికి, ఈ నెల ఒకటి నుంచి 14 వరకు వెయ్యి ఆరు వందల 18 మంది చిన్నారులకు వైరస్ సోకినట్లు గణాంకాలు చెబుతున్నాయి. దీనిని బట్టి చిన్నారులపై కొవిడ్‌ ప్రభావం అంతకంతకూ పెరుగుతోందని స్పష్టమవుతోంది.
