భారత మహిళా క్రికెట్ జట్టు ఆల్ రౌండర్‌గా గుర్తింపు పొందిన దీప్తి శర్మకు ఉత్తరప్రదేశ్ ప్రభుత్వం నజరానా ప్రకటించింది. ఆమెను డీఎస్పీగా నియమిస్తూ ఉత్తర్వులు జారీచేసింది. ఒక క్రికెటర్‌గా దేశానికి ఆమె చేసిన సేవకు గుర్తింపుగా జనవరి 27వ తేదీన యూపీలోని మొరాదాబాద్ జిల్లాలో డీఎస్పీగా నియమిస్తూ ఉత్తర్వులు జారీ చేసింది. ఈ విషయాన్ని దీప్తి బుధవారం నాడు తన ఇన్‌స్టాగ్రామ్‌ ఖాతా ద్వారా తెలియజేసింది.
ఈ సందర్భంగా తనకు తగిన గౌరవం ఇచ్చినందుకు ఉత్తరప్రదేశ్ ప్రభుత్వానికి ధన్యవాదాలు తెలుపుతూ ఫొటోలను పంచుకుంది. 'ఈ మైలురాయిని సాధించినందుకు ఎంతో గర్వంగా ఉంది. డీఎస్పీ పోస్టుతో నా చిన్ననాటి కల నెరవేరింది. అన్ని విధాల నాకు తోడ్పాటు అందించిన నా కుటుంబానికి హృదయపూర్వక కృతజ్ఞతలు తెలియజేస్తున్నాను. వారి అచంచలమైన మద్దతు, ఆశీర్వాదాలు ఈరోజు నన్ను ఈ స్థాయిలో నిలబెట్టాయి. ఈ అవకాశం కల్పించినందుకు ఉత్తరప్రదేశ్ ప్రభుత్వానికి కూడా కృతజ్ఞతలు తెలుపుతున్నాను. డీఎస్పీగా నా విధులను చిత్తశుద్ధితో నిర్వహిస్తానని హామీ ఇస్తున్నాను. నాకు మద్దతుగా నిలిచిన అందరికీ ధన్యవాదాలు' అని దీప్తి శర్మ తన ఇన్‌స్టా స్టోరీలో రాసుకొచ్చారు.
కాగా, 2024లో టీ20 ప్రపంచ కప్ విజయం తర్వాత తెలంగాణ ప్రభుత్వం హైదరాబాదీ బౌలర్ మహమ్మద్ సిరాజు డీఎస్పీగా నియమించిన విషయం తెలిసిందే. ఆ తర్వాత ఇప్పుడు దీప్తి శర్మ ఇటీవలి కాలంలో ఆ స్థానాన్ని పొందిన రెండవ భారతీయ క్రికెటర్ అయింది.
