కరోనా వైరస్ సోకి భారత క్రికెటర్ ఒకరు కన్నమూశారు. ఈయన ఢిల్లీ అండర్ 23 జట్టుకు సహాయక సిబ్బందిగా కూడా సేవలు అందించాడు. ఆ క్రికెటర్ పేరు సంజయ్ డోబల్. ఈయనకు కరోనా వైరస్ సోకడంతో ఆస్పత్రిలో చికిత్స పొందుతూ వచ్చాడు. అయితే, ఆస్పత్రిలో చేరి చికిత్స పొందినప్పటికీ ఫలితం లేకుండా పోయింది. దీంతో ఆయన తాజాగా కన్నుమూశారు.
53 యేళ్ళ వయసున్న డోబల్‌కు భార్య, ఇద్దరు కుమారులు ఉన్నారు. పెద్ద కుమారుడు సిద్ధాంత్.. రాజస్థాన్ తరపున ఫస్ట్ క్లాస్ క్రికెట్ ఆడుతుండగా.. చిన్న కుమారుడు ఏకాన్ష్‌ ఢిల్లీ అండర్ -23 జట్టులో అరంగేట్రం చేశాడు.
ఢిల్లీ క్రికెటర్లలో వీరేందర్ సెహ్వాగ్, గౌతమ్ గంభీర్, మిథున్ మన్హాస్‌తో కలిసి ఆడారు. అతను సొనెట్ క్రికెట్ క్లబ్ తరపున ఆడి కోచ్‌ తారక్ సిన్హా శిక్షణలో రాటుదేలారు. రంజీలో ఆడనప్పటికీ డోబల్ ఎయిర్ ఇండియాతో కాంట్రాక్ట్‌ ముగిసిన తర్వాత జూనియర్ క్రికెటర్లకు శిక్షకుడిగా సేవలందించారు.
