మెంతులు ఆరోగ్యానికి చాలా మంచిది, దీనిని వంటలలో ఉపయోగిస్తారు, కానీ ఇది పలు రకాల వ్యాధులకు మందులా పనిచేస్తుంది. మనకు కడుపునొప్పి వచ్చినా, వేడి చేసినా మెంతులు తీసుకోవడం సాధారణం. కొంత మంది మెంతులను నానబెట్టి మెత్తగా రుబ్బి తలపై వేసుకుంటారు.
మెంతి పొడిని ఊరగాయల్లోనూ వాడతారు. ఇలా మెంతుల వలన చాలా ప్రయోజనాలు ఉన్నాయి. అవేంటో చూద్దాం. మెంతులలో పీచు పదార్థం అధికంగా ఉంటుంది. ఐరన్ సమృద్ధిగా ఉంటుంది. దానితో పాటు విటమిన్‌-సి, బి1, బి2, కాల్షియం ఉంటాయి. దీనిలో క్యాలరీలు కూడా తక్కువే కాబట్టి బరువు తగ్గాలనుకునే వారు వీటిని తీసుకోవచ్చు.
ఈ గింజలలో కొన్ని రకాల రసాయనాలు ఉంటాయి, గింజల్లోని జిగురు, చెడు రుచికి కారణం అదే. జీర్ణాశయం సంబంధ సమస్యలకు మెంతులు మంచి ఔషధం. స్థూలకాయం, చెడు కొలెస్ట్రాల్, మధుమేహం అదుపునకు ఇవి దోహదపడతాయి.
