చైనాలో ఫిబ్రవరి మధ్య నాటికే 2.32 లక్షల కరోనా కేసులు ఉండేవని ఓ అధ్యయనం వెల్లడించింది. 'మొదటి దశ వైరస్‌ వ్యాప్తిలో చైనాలో కనీసం 2,32,000 పాజిటివ్‌ కేసులు ఉండేవని ఫెంగ్‌వూ నేతృత్వంలోని హాంకాంగ్‌ విశ్వవిద్యాలయం పరిశోధకులు అంచనా వేస్తున్నారు. వైరస్‌ బాధితులను గణించే ప్రమాణాల ఆధారంగా జరిగిన అధ్యయనంలో ఈ విషయం వెల్లడి అయినట్లు పరిశోధకులు తెలిపారు. దీనిని ప్రముఖ వైద్య జర్నల్‌ లాన్సెట్‌లో ప్రచురించారు.
చైనా జాతీయ ఆరోగ్య కమిషన్‌ (ఎన్‌హెచ్‌సీ) ప్రకారం బుధవారం నాటికి ఆ దేశంలో 82,789 కేసులు నమోదు కాగా 4,632 మంది మరణించారు. అధ్యయనం ప్రకారం ఈ సంఖ్యకు నాలుగురెట్ల కేసులు అక్కడ ఉంటాయి. కోవిడ్‌-19 రోగుల సంఖ్య, వైరస్‌ ప్రభావాన్ని తగ్గించి చెబుతోందని చైనాపై ఇప్పటికే అమెరికా, ఐరోపా దేశాలు మూకుమ్మడిగా విమర్శిస్తున్నాయి.
జనవరిలో అమలు చేసిన 'కరోనా వైరస్‌ కేసుల డెఫినెషన్‌'ను ఉపయోగించి వుంటే చైనాలో ఫిబ్రవరి 20 నాటికి అధికారులు చెప్పిన 55,000 కాకుండా 2,32,000 ధ్రువీకరించిన కేసులు ఉండేవని తాజా అధ్యయనం తెలిపింది. విస్తృత ప్రమాణాలను వినియోగిస్తే ఇప్పుడు కేసులకు నాలుగు రెట్లు బాధితులు ఉండేవారని వెల్లడించింది. గతేడాది డిసెంబర్లో కరోనా వైరస్‌ మహమ్మారి బయటపడిన సంగతి తెలిసిందే.
