అమీర్ ఖాన్ హీరోగా నిర్మించిన ''దంగల్'' సినిమా కలెక్షన్ల వర్షం కురిపించిన సంగతి తెలిసిందే. భారత రెజ్లర్లు గీత, బబిత ఫోగాట్.. వారి తండ్రి మహావీర్ ఫోగాట్ జీవిత చరిత్రపై అమీర్ ఖాన్ దంగల్ సినిమాను తెరకెక్కించారు. ఈ సినిమా క్లైమాక్స్‌లో తన కుమార్తె ఫైనల్ మ్యాచ్‌ను చూడనీయకుండా మహావీర్‌ను ఓ గదిలో బంధిస్తారు. ఈ సీన్ ప్రస్తుతం రిపీట్ అయ్యింది.
వివరాల్లోకి వెళితే గోల్డ్ కోస్ట్‌లో జరుగుతున్న కామన్వెల్త్ పోటీల్లో బబిత 53 కేజీల విభాగంలో భారత్‌కు ప్రాతినిధ్యం వహిస్తున్న సంగతి తెలిసిందే. బబిత ఫైనల్ పోరును చూసేందుకు వెళ్లిన మహావీర్ స్టేడియం బయటే ఆగిపోవాల్సి వచ్చింది. తొలి మూడు బౌట్‌లనూ ఆయన చూడలేకపోయారు. చివరకు ఆస్ట్రేలియా రెజర్లకు ఇచ్చిన ఓ టికెట్‌తో ఆయన లోపలికి వెళ్లి చివరి క్షణాలను మాత్రం చూడగలిగారు.
ఈ వ్యవహారంపై అధికారులు స్పందిస్తూ, రెజ్లింగ్ కోచ్ తోమర్‌కు తాము ఐదు టికెట్లు ఇచ్చామని, వాటిల్లో ఒకటి మహావీర్‌కు ఎందుకు అందలేదో తెలియదన్నారు. ప్రతి అథ్లెట్లకు రెండు టిక్కెట్లు ఇస్తారని.. కానీ రాత్రి వరకు ప్రయత్నించినా.. తనకు టిక్కెట్లు ఇవ్వలేదని బబిత వాపోయింది. కాగా ఈ పోటీల్లో బబిత ఫోగోట్ రజతంతో సరిపెట్టుకుంది.
