ఈ క్రీడల తొలి రోజైన గురువారం బంగారు పతకం వచ్చింది. వరల్డ్ ఛాంపియన్ వెయిట్‌లిఫ్టర్ మీరాబాయ్ ఛాను 48 కేజీల విభాగంలో స్వర్ణ పతకాన్ని గెలుచుకుని భారత్ కీర్తిని ఇనుమడింపజేసింది. తన శరీరం బరువుకు రెట్టింపు కంటే ఎక్కువ బరువును ఎత్తడం ద్వారా (103 కిలోలు, 107 కిలోలు, 110 కిలోలు) ఓవరాల్ గేమ్ రికార్డును సొంతం చేసుకుంది. తద్వారా సరికొత్త రికార్డును నెలకొల్పింది.
దీనిపై బాలీవుడ్ సూపర్ స్టార్ అమితాబ్ బచ్చన్ ట్వీట్ చేశారు. 'గోల్డెన్ గాళ్' (స్వర్ణబాల) అంటూ మీరాభాయ్ ఛానుపై బిగ్ బి ప్రశంసల వర్షం కురిపించారు. అలాగే, దేశం నలమూలల నుంచి ప్రశంసల జల్లు కురుస్తోంది. కాగా, 21వ కామన్వెల్త్ క్రీడల ప్రారంభవేడుకలు బుధవారం అట్టహాసంగా జరుగగా, ప్రధాన పోటీలు గురువారం నుంచి మొదలయ్యాయి.
