తెలంగాణ పీసీసీ చీఫ్ రేవంత్ రెడ్డి గురువారం ఆ రాష్ట్ర ముఖ్యమంత్రిగా ప్రమాణ స్వీకారం చేయనున్నారు. ఇందుకోసం తెలంగాణ ప్రభుత్వ అధికారులు అన్ని ఏర్పాట్లు పూర్తి చేశారు. రాష్ట్ర ముఖ్యమంత్రిగా ఏ.రేవంత్ రెడ్డి గురువారం మధ్యాహ్నం 1.04 గంటలకు హైదరాబాద్ నగరంలోని ఎల్బీ స్టేడియంలో ప్రమాణ స్వీకారం చేస్తారు. రేవంత్, మంత్రులతో గవర్నర్ తమిళసై సౌందరరాజన్ ప్రమాణం చేయిస్తారు.
నిజానికి ఈ ప్రమాణ స్వీకారోత్సవ కార్యక్రమాన్ని ఉదయం 10.28 గంటలకు నిర్వహించాలని భావించినా.. తర్వాత ముహూర్త సమయాన్ని మార్చారు. పార్టీ ఎన్నికల హామీగా ఇచ్చిన 'ఆరు గ్యారంటీల' చట్టానికి సంబంధించిన ముసాయిదాపై ముఖ్యమంత్రి హోదాలో రేవంత్ రెడ్డి తొలి సంతకం చేయనున్నారు. ఆయనతో పాటు మరికొద్ది మంత్రులు ప్రమాణస్వీకారం చేసే అవకాశం ఉన్నట్టు తెలుస్తుంది.
కొత్త ప్రభుత్వం ఏర్పాటుకు సన్నాహకంగా.. సీఎల్పీ సమావేశంలో రేవంత్ రెడ్డిని తమ నాయకుడిగా ఎన్నుకున్నట్లు ఎమ్మెల్యేల సంతకాలతో కూడిన లేఖను కాంగ్రెస్ నాయకులు అందజేయగా.. గవర్నర్ ఆమోదం తెలిపారు. ఈ మేరకు ఉన్నతాధికారులు ఏర్పాట్లు చేపట్టారు. ప్రొటోకాల్ ప్రకారం.. తెలంగాణ హైకోర్టు ప్రధాన న్యాయమూర్తి జస్టిస్ ఆలోక్ అరాధే సహా పలువురు ప్రముఖులకు ప్రభుత్వం నుంచి ఆహ్వానాలు వెళ్లాయి.
కాంగ్రెస్ పార్టీ పరంగా కూడా వివిధ రాష్ట్రాల ముఖ్యమంత్రులు, మాజీ సీఎంలు, వివిధ రాజకీయపక్షాల నాయకులకు ఆహ్వానాలు పంపారు. వీరిలో మాజీ సీఎంలు కేసీఆర్, చంద్రబాబు, ఏపీ, తమిళనాడు సీఎంలు జగన్, స్టాలిన్ తదితరులున్నారు. సీపీఐ జాతీయ ప్రధాన కార్యదర్శి డి. రాజా సహా కొందరు వామపక్ష నాయకులు ప్రమాణ స్వీకారోత్సవానికి హాజరు కానున్నట్లు సమాచారం.
