తెలంగాణ రాష్ట్రంలోకి నైరుతి రుతుపవనాలు గురువారం ప్రవేశించాయి. దీంతో రాష్ట్రంలో పలు చోట్ల గురువారం, శుక్రవారం మోస్తరు నుంచి భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం అధికారులు తెలిపారు. ఇప్పటికే రాయలసీమ జిల్లాల్లో రుతుపవనాలు విస్తరించటంతో… వర్షాలు కురుస్తున్నాయని చెప్పారు.
బుధవారం రాష్ట్రంలోని కొడంగల్‌లో అత్యధికంగా 5 సెంటీమీటర్ల వర్షం కురిసింది. యాచారంలో 4 సెంటీ మీటర్లు, సరూర్ నగర్‌లో 3 సెంటీ మీటర్ల వర్షం నమోదైంది. మరోవైపు జిల్లాల్లో కూడా అక్కడక్కడా ఉరుములు, మెరుపులతో కూడిన వర్షం కురిసింది. భద్రాద్రి కొత్తగూడెం జిల్లాలోని కొత్తగూడెం, ఇల్లెందు, పినపాకలో వర్షం పడింది.
అటు వరంగల్, కరీంనగర్ జిల్లాలోనూ చిరుజల్లులుల కురిశాయి. మరోవైపు వర్షంతో మార్కెట్లలో పంట తడిసి ముద్దయ్యింది. రాజధాని హైదరాబాద్‌ను తొలకరి పలకరించింది. అర్థరాత్రి మొదలైన వర్షం… తెల్లవారుజాము వరకు దంచికొట్టింది. దాదాపు 4 గంటల పాటు ఉరుములు, మెరుపులతో కూడిన వర్షం కురిసింది.
ఎల్బీనగర్, చాదర్ ఘాట్, సైదాబాద్, తార్నాక, వారాసిగూడ, ఉప్పల్, సికింద్రాబాద్, బోయిన్ పల్లి, అమీర్ పేట, బంజారాహిల్స్, జూబ్లీహిల్స్ వంటి ప్రాంతాల్లో వర్షం పడింది. దీంతో పలుచోట్ల రోడ్లపైకి భారీగా వరద నీరు వచ్చి చేసింది.
