తెలంగాణ రాష్ట్ర సమితికి చెందిన ఎమ్మెల్యే, సినీ నటుడు బాబూమోహన్ మరోమారు తన నోటిదూలను ప్రదర్శించారు. పుల్‌కల్ తహసీల్దారుపై తిట్లదండకం చదివారు. దీనికి సంబంధించిన వీడియో ఒకటి సోషల్ మీడియాలో వైరల్ అయింది. తాజాగా వెలుగు చూసిన వార్త వివరాలను పరిశీలిస్తే..
'పాలిటెక్నిక్‌ కళాశాలకు దారి లేదని రెండేళ్లుగా చెబుతున్నాను. ఎల్లుండి హోం మంత్రి, అవతలి ఎల్లుండి డిప్యూటీ సీఎం వస్తుంటే.. ఒక వీఆర్వోను పంపి రోడ్డు చూసి రమ్మంటావా? ఏమనుకుంటున్నావయ్యా? నువ్వెంత.. నీ ఉద్యోగమెంత? డిప్యూటీ సీఎంకు ఏం చెప్పాలి? నిన్ను సస్పెండ్‌ చేయమని చెప్పనా?' అంటూ విరుచుకుపడ్డారు.
అంతేనా, ‘మీరు ఊరకనే ఉద్యోగాలు చేస్తున్నారు. నువ్వు ముందుపొయ్యి అక్కడ ఉండాలి కదా? ఇంజనీర్‌కు చెప్పి పని చేయించాలి కదా? అక్కడే పాలిటెక్నిక్‌ దగ్గర రోడ్డు మీద ఉండు. టేక్మల్‌ నుంచి వస్తున్నా..’ అంటూ బాబూమోహన్ ఆగ్రహం వ్యక్తం చేయడం ఉద్యోగ, రాజకీయ వర్గాల్లో చర్చనీయాంశమవుతోంది.
