రవితేజ, డాషింగ్‌ డైరెక్టర్‌ పూరి జగన్నాథ్‌ల కాంబినేషన్‌లో వచ్చిన ఇట్లు శ్రావణి సుబ్రమణ్యం, ఇడియట్‌, అమ్మా నాన్న ఓ తమిళ అమ్మాయి సూపర్‌హిట్‌ అయ్యాయి. ఈ సూపర్‌హిట్‌ కాంబినేషన్‌లో రిలయన్స్‌ ఎంటర్‌టైన్‌మెంట్‌ సమర్పణలో శ్రీ వెంకటేశ్వర సినీ చిత్ర పతాకంపై భారీ చిత్రాల నిర్మాత 'ఛత్రపతి' ప్రసాద్‌ 'దేవుడు చేసిన మనుషులు' అనే పక్కా కమర్షియల్‌ ఎంటర్‌టైనర్‌ని నిర్మిస్తున్నారు. ఫిబ్రవరి 17న షూటింగ్‌ ప్రారంభం అవుతుంది.
ఈ చిత్రం గురించి రవితేజ మాట్లాడుతూ - ''జగన్‌ కాంబినేషన్‌లో చేస్తున్న 5వ చిత్రం ఇది. మా కాంబినేషన్‌లో ఎక్స్‌పెక్ట్‌ చేసే అన్ని కమర్షియల్‌ ఎలిమెంట్స్‌ ఇందులో వుంటాయి. మా బి.వి.ఎస్‌. ఎన్‌.ప్రసాద్‌గారి బేనర్‌లో ఈ సినిమా చెయ్యడం హ్యాపీ'' అన్నారు.
డాషింగ్‌ డైరెక్టర్‌ పూరి జగన్నాథ్‌ మాట్లాడుతూ - ''రవితేజతో చేస్తున్న మంచి కమర్షియల్‌ ఫిలిమ్‌ ఇది. రవి క్యారెక్టరైజేషన్‌ చాలా డిఫరెంట్‌గా వుంటుంది. మంచి ఎంటర్‌టైన్‌మెంట్‌తో అందరినీ అలరించే సినిమా అవుతుంది'' అన్నారు. భారీ నిర్మాత బి.వి.ఎస్‌.ఎన్‌.ప్రసాద్‌ మాట్లాడుతూ - ''రవితేజ, పూరి జగన్నాథ్‌ల సూపర్‌హిట్‌ కాంబినేషన్‌లో మా బేనర్‌లో 'దేవుడు చేసిన మనుషులు' సినిమా చెయ్యడం చాలా ఆనందంగా వుంది.
వరసగా హిట్స్‌ ఇస్తున్న రవితేజ, తాజాగా 'బిజినెస్‌మేన్‌'తో రికార్డులు సృష్టించిన పూరి జగన్నాథ్‌.. ఇద్దరూ కలిసి 'దేవుడు చేసిన మనుషులు'ని పెద్ద రేంజ్‌ సినిమాగా రూపొందించబోతున్నారు. హండ్రెడ్‌ పర్సెంట్‌ పక్కా కమర్షియల్‌ మాస్‌ ఎంటర్‌టైనర్‌ ఇది. ఇంతకుముందు వచ్చిన 'దేవుడు చేసిన మనుషులు' కథకు, ఈ సినిమా కథకు ఏ విధమైన సంబంధం లేదు.
కమర్షియల్‌ సినిమాల్లో ఇది ఓ ట్రెండ్‌ సెట్టర్‌ అవుతుంది. రవితేజ సరసన ఇలియానా నటిస్తుంది. ఫిబ్రవరి 17న షూటింగ్‌ ప్రారంభం అయ్యే ఈ చిత్రం రెగ్యులర్‌ షూటింగ్‌ మార్చి 1 నుంచి ఏకధాటిగా జరుగుతుంది. జూన్‌లో రిలీజ్‌ అవుతుంది'' అన్నారు.
