ప్రిన్స్ మహేష్ బాబు హీరోగా, రకుల్ ప్రీత్ సింగ్ హీరోయిన్‌గా తమిళ దర్శకుడు ఏఆర్ మురుగదాస్ నిర్మించిన చిత్రం స్పైడర్. ఈ చిత్రం ఈనెల 27వ తేదీన విడుదలై నెగెటివ్ టాక్‌ను సొంతం చేసుకుంది. అయితే, ఈ చిత్రం టాక్ ఎలా ఉన్నప్పటికీ భారీ వసూళ్లను సాధిస్తోంది. సినిమా విడుదలైన కాసేపటికే డివైడ్ టాక్ వచ్చినప్పటికీ... కలెక్షన్లలో మాత్రం 'స్పైడర్' ఏ మాత్రం తగ్గలేదు.
తొలి రోజున ఏకంగా రూ. 51 కోట్లను కలెక్ట్ చేసినట్టు చిత్ర బృందం అధికారికంగా ప్రకటించింది. రెండో రోజు కూడా ఈ సినిమా ఇదే జోరును ప్రదర్శించింది. సెకండ్ డే రూ.34 కోట్లను వసూలు చేసిందని... తొలి రెండు రోజుల్లో రూ.85 కోట్లను కలెక్ట్ చేసిందని ప్రముఖ సినీ విశ్లేషకుడు ఉమైర్ సంధు తెలిపాడు. ఈ వీకెండ్‌లో 100 కోట్ల మార్క్‌ను అధిగమిస్తుందని సినీ వర్గాలు అంచనా వేస్తున్నాయి.
కాగా, ఓవర్సీస్‌లో కూడా 'స్పైడర్' చిత్రం కలెక్షన్లను కుమ్మేస్తోంది. తెలుగు, తమిళ భాషల్లో విడుదలైన ఈ చిత్రం క్లాస్ ఆడియన్స్‌ను బాగా ఆకట్టుకుంది. ముఖ్యంగా ఓవర్సీస్‌లో ఈ సినిమాకు భారీ ఆదరణ వచ్చింది. ప్రపంచ వ్యాప్తంగా ఈ సినిమా తొలిరోజు రూ.38 కోట్ల కలెక్షన్లను సాధించింది. ఓవర్సీస్‌లో మహేష్ బాబుకు ఉన్న క్రేజ్ దీనికి కారణమని సినీ విశ్లేషకుడు ఉమైర్ సంధు తెలిపాడు. మహేష్ బాబు కెరీర్లో ఓవర్సీస్‌లో ఇప్పటివరకు హయ్యెస్ట్ గ్రాసర్‌గా 'శ్రీమంతుడు' ఉన్న విషయం తెల్సిందే.
