గతకొన్నేళ్ళుగా మంచి ఫామ్‌లో ఉన్నాడు సరైనోడు ‘అల్లు అర్జున్’. హీరోగా చేసినా, గెస్ట్ రోల్ అయినా అదరగొట్టేస్తున్నాడు. అంతేకాక యాక్టింగ్, ఫైట్స్, డ్యాన్సుల్లో ఇరగదీసేస్తున్నాడు అల్లూవారబ్బాయి. ఇంతకీ విషయమేంటంటే తన గత సినిమాలైన రేసుగుర్రం, S/o. సత్యమూర్తి, సరైనోడు వరుసగా 2014, 2015, 2016 సంవత్సరాల ఏప్రిల్ నెలలో వేసవికి రిలీజై హీరోగా హ్యాట్రిక్ హిట్‌లు కొట్టాడు.
ఆ మధ్యలో ‘గోనగన్నారెడ్డి’ పాత్రతో ‘రుద్రమదేవి’ సినిమాలో చేసినా అది కాస్తా అతిథి పాత్రే. కానీ ఈ సంవత్సరం ‘దువ్వాడ జగన్నాథమ్’గా ఏప్రిల్ నెలలో వస్తాడని అనుకున్నారంతా, కానీ ఇంకా పోస్ట్ ప్రొడక్షన్ పనులు అలాగే ఉండిపోవడంతో, ఇతర పెద్ద సినిమాల రిలీజ్‌లు ఉండటంతో, ఈ సినిమా కాస్తా జూన్ 23వ తేదీకి వాయిదా పడింది. ఇలా ‘బన్నీ’ తన సెంటిమెంట్‌ని ఫాలో కాలేకపోయాడు. అప్పటికైనా అనుకున్న తేదీకి ‘డిజే’గా వస్తాడో లేదో వేచి చూద్దాం.
