టాలీవుడ్ హీరోలు చూసేందుకు కుర్రోళ్లుగా కనిపిస్తారు. కానీ, వారికి పెళ్లీడుకొచ్చిన కుమారులు, కుమార్తెలు ఉన్నారు. వీరిలో ఎక్కువమంది ప్రేమ వివాహాలకే మొగ్గు చూపుతున్నారు. తమ మనసుకు నచ్చితే కులంగోత్రాలు, ఆస్తులు అంతస్తులను పట్టించుకోకుండా మూడుముళ్ళ బంధంతో ఒక్కటయ్యేందుకు అమితాసక్తి చూపుతున్నారు.
ఈ కోవలో టాలీవుడ్ మన్మథుడుగా ఉన్న అక్కినేని నాగార్జున కుమారుడు నాగ చైతన్య. హీరోయిన్ సమంతను ప్రేమించి పెళ్లి చేసుకున్నాడు. అలాగే, చిరంజీవి తనయుడు రామ్ చరణ్, ప్రముఖ నిర్మాత అల్లు అరవింద్ కుమారుడు అల్లు అర్జున్ కూడా ప్రేమ వివాహమే చేసుకున్నారు.
కానీ, టాలీవుడ్ సీనియర్ హీరోల్లో ఒకరైన విక్టరీ వెంకటేష్ ఫ్యామిలీ గురించి పెద్దగా ఎవరికీ తెలియదు. కానీ, ఆయనకు పెళ్లీడుకొచ్చిన కుమార్తె ఆశ్రిత ఉంది. ఈ యువతి ఓ యువకుడుతో ప్రేమలో పడినట్టు సమాచారం. ఈ విషయం తెలిసిన వెంకటేష్ కుమార్తె అభీష్టం మేరకు ప్రేమ వివాహం చేయాలని భావిస్తున్నట్టు ఫిల్మ్ నగర్‌ వర్గాల సమాచారం.
నిజానికి ఇప్పటివరకూ వెంకీ తన కుటుంబ సభ్యులను పెద్దగా బయట ప్రపంచానికి చూపించింది లేదు. వెంకీకి ఒక కుమారుడు అర్జున్, కూతురు ఆశ్రిత ఉన్నారు. కూతురు ఆశ్రిత బేకరి రంగంలో వృత్తి నిపుణురాలిగా శిక్షణ తీసుకుంది. ఆమె ఓ ప్రముఖుడి కుమారుడిని ప్రేమించిందని తెలుస్తోంది.
