మెగాస్టార్ చిరంజీవి నటించే సైరా సినిమాలో పవర్ స్టార్ పవన్ కనిపించబోతున్నారని ఫిలిమ్ నగర్ వర్గాల్లో జోరుగా ప్రచారం సాగుతోంది. గతంలో చిరూ సినిమాల్లో పవన్ మెరిసిన సందర్భాలున్నాయి. ఈ నేపథ్యంలో మెగాస్టార్ 151వ సినిమా సైరా నరసింహా రెడ్డిలో పవన్ కనిపిస్తాడని తెలుస్తోంది. 'శంకర్ దాదా ఎంబీబీఎస్, శంకర్ దాదా జిందాబాద్‌లోను అన్నయ్యతో కలిసి పవన్ కల్యాణ్ సందడి చేశాడు.
తాజాగా సైరాలోనూ అన్నయ్యతో కలిసి పవన్ తెరపై కనిపిస్తాడని తెలుస్తోంది. ఈ సినిమాలో 10 నిమిషాల నిడివి కలిగిన ఒక ముఖ్యమైన పాత్ర ఉండటంతో, స్టార్ హీరోతోనే ఆ పాత్ర చేయించాలని ఈ సినిమా టీమ్ భావించిందట. ఈ పాత్రలో వెంకటేశ్ కనిపించనున్నట్టు ప్రచారం జరిగింది. కానీ అందులో నిజం లేదని తేలిపోయింది. ఈ పాత్ర కోసం పవన్ కల్యాణ్‌ను సంప్రదించగా ఆయన గ్రీన్ సిగ్నల్ ఇచ్చేసినట్టు తెలుస్తోంది.
అలాగే తాజాగా సైరాలో మరో కీలక పాత్ర కోసం భోజ్‌పురి నటుడు రేసుగుర్రం విలన్ రవికిషన్‌ను ఎంపిక చేసుకున్నారు. సైరా నరసింహా రెడ్డి సినిమాను సెట్స్‌పైకి తీసుకెళ్లే దిశగా ఏర్పాట్లు చకచకా జరిగిపోతున్నాయి. డిసెంబర్ ఆరోతేదీన ఈ సినిమా షూటింగ్‌ను మొదలుపెట్టడానికి రంగాన్ని సిద్ధం చేస్తున్నారు. మరోవైపున ఈ సినిమాకి సంబంధించిన నటీనటుల ఎంపిక కొనసాగుతూనే వుంది. నయనతార కథానాయికగా నటించనున్న ఈ సినిమాలో, ముఖ్యమైన పాత్రల కోసం అమితాబ్, సుదీప్, విజయ్ సేతుపతిని తీసుకున్న సంగతి తెలిసిందే.
