సినీ తార, అతిలోక సుందరి అంత్యక్రియలు ముగిసిన వేళ.. శ్రీదేవి మృతిపై మీడియా చేస్తున్న సర్కస్ చూసి కోపం, బాధ తన్నుకొస్తున్నాయని బాలీవుడ్ నటి ప్రీతి జింటా మండిపడింది. రేటింగ్ కోసం మీడియా దిగజారిందని.. నైపుణ్యతకు, నటనకు నిలయమైన సినీతార శ్రీదేవిపై దిగజారుడు కథనాలు ప్రచురించేందుకు మీడియాకు అంత ధైర్యం ఎలా వచ్చిందంటూ ప్రీతి జింటా ప్రశ్నించింది.
అలాగే ప్రీతి జింటా శ్రీదేవి పట్ల తనకున్న అభిమానాన్ని వెల్లడించింది. శ్రీదేవిని కడసారి చూసేందుకు రాలేకపోయానని బాధపడింది. ఈ క్రమంలో ఇన్‌స్టాగ్రామ్ ఖాతాలో తాను రాలేకపోతున్నందుకు కారణం కూడా చెప్పింది. శ్రీదేవికి అంతిమ వీడ్కోలుకు అందరూ ముంబైకి వెళ్లేవుంటారు. కానీ ఈ భూగోళానికి మరోవైపున తానున్నట్లు ప్రీతి జింటా తెలిపింది.
