రాజమౌళి, మహేష్ బాబు కాంబినేషన్‌లో "ఎస్ఎస్ఎంబీ 26" చిత్రం తెరకెక్కనుంది. ఈ చిత్రం ప్రీప్రొడక్షన్ పనులు శరవేగంగా సాగుతున్నాయి. త్వరలోనే సెట్స్ పైకి వెళ్లనుంది. ఈ నేపథ్యంలో హీరో మహేష్ బాబుతో దర్శకుడు రాజమౌళి ఓ కీలక ఒప్పందాన్ని కుదుర్చుకున్నారు. ఈ డీల్ పేరు నాన్ డిస్‌క్లోజర్ అగ్రిమెంట్. సినిమా షూటింగ్ పూర్తయ్యేంత వరకు ఈ సినిమాకు సంబంధించిన ఏ ఒక్క విషయాన్ని కూడా బయటకు వెల్లడించకూడదు. చర్చించకూడదన్నదే ఈ అగ్రిమెంట్ ముఖ్యోద్దేశం. ఈ మూవీని యాక్షన్ అడ్వెంచర్ డ్రామాగా తెరకెక్కించనున్నారు. ఈ విషయాన్ని కథా రచయిత విజయేంద్ర ప్రసాద్ వెల్లడించారు.
కాగా, ఇప్పటికే మహేశ్ పాస్‌పోర్టును దర్శకుడు రాజమౌళి స్వాధీనం చేసుకున్నట్టు అర్థం వచ్చేలా ఇన్‌స్టాలో ఓ వీడియోను పోస్ట్ చేయడంతో ఈ మూవీ షూటింగ్ కూడా మొదలు పెట్టినట్లు తెలుస్తోంది. టాలీవుడ్ సీనియర్ నిర్మాత కేఎల్ నారాయణ భారీ బడ్జెట్‌తో నిర్మిస్తున్న ఈ చిత్రానికి సంబంధించి ఎలాంటి లీకులు లేకుండా మేకర్స్ ఎంతో జాగ్రత్త పడుతున్నారు.
ఇందులోభాగంగానే ఈ భారీ ప్రాజెక్టులో నటిస్తున్న మహేశ్ బాబు, ప్రియాంక చోప్రా మినహా ఇతర నటీనటుల వివరాలు బయటకు రాకుండా మేకర్స్ చర్యలు తీసుకుంటున్నారు. ఈ విషయంలో చిత్రం యూనిటికి గట్టిగానే హెచ్చరికలు జారీ చేసినట్లు సమాచారం. ఇందులో భాగంగా నటీనటులు, సాంకేతిక నిపుణులతో 'నాన్-డిస్ క్లోజ్ అగ్రిమెంట్' (ఎన్ డీఏ) చేయించినట్లు ఆంగ్ల పత్రిక కథనాలు వెలువరించాయి.
ఈ అగ్రిమెంట్ ప్రకారం దర్శక-నిర్మాతల అనుమతి లేకుండా ఎవరైనా సమాచారాన్ని లీక్ చేసినా, బయటకు చెప్పినా భారీ మూల్యం చెల్లించాల్సి ఉంటుంది. మరోవైపు ప్రిన్స్ మహేశ్ సహా షూటింగ్ స్పాట్‌లో ఎవరూ మొబైల్ ఫోన్లు తీసుకురావడానికి అనుమతి లేదట. కాగా, ఈ సినిమా షూటింగ్ ప్రస్తుతం అల్యూమినియం ఫ్యాక్టరీలో వేసిన ప్రత్యేక సెట్‌లో జరుగుతున్నట్లు తెలుస్తోంది. భారీ బడ్జెట్‌తో తెరకెక్కనున్న ఈ చిత్రంలో హాలీవుడ్ టెక్నీషియన్స్ కూడా భాగం కానున్నారు.
మరోవైపు, ఈ చిత్రం కోసం ప్రిన్స్ పూర్తిగా మేకోవర్ అయిన విషయం తెలిసిందే. లాంగ్ హెయిర్టెయిల్, గుబురు గడ్డంతో మహేశ్ ఇటీవల పలు వేడుకల్లో కనిపించారు. అలాగే బాడీ కూడా బాగా బిల్డ్ చేశారు. మహేశ్ కొత్త లుక్ పట్ల ఆయన అభిమానులు ఫుల్ ఖుషీ అవుతున్నారు.
