తెలుగు భాషా సంస్కృతి చైతన్యయాత్ర రెండో దఫా కార్యక్రమం సెప్టెంబరు నెలలో నిర్వహించనున్నట్లు ఆచార్య యార్లగడ్డ లక్ష్మీప్రసాద్ వెల్లడించారు. విజయవాడ కవితా నిలయం నుంచి ప్రారంభమైన యాత్ర.. శ్రీకాకుళం జిల్లా కథా నిలయంలో ముగింపు సందర్భంగా ఆయన పై విధంగా పేర్కొన్నారు.
ఈ సందర్భంగా యార్లగడ్డ మాట్లాడుతూ... ఇప్పటిదాకా విజయవాడ, కాకినాడ, తుని, విశాఖపట్టణం, విజయనగరం, శ్రీకాకుళం పట్టణాలలో చైతన్యయాత్రలు నిర్వహించినట్లు చెప్పారు. నార్ల వెంకటేశ్వరరావు శత జయంతి ఉత్సవాల్లో భాగంగా ఈ చైతన్య యాత్రలను నిర్వహిస్తున్నట్లు ఆయన తెలిపారు.
రెండో దఫా చైతన్య యాత్రలో... "జ్ఞానపీఠం నుంచి జ్ఞానపీఠం వరకు" అనే నినాదంతో తొలి జ్ఞానపీఠ్ పురస్కార గ్రహీత డాక్టర్ సి. నారాయణ రెడ్డి స్వగ్రామం వరకు ఉంటుందని యార్లగడ్డ ఈ సందర్భంగా ప్రకటించారు. కాగా, అంతకుముందు శ్రీకాకుళం సూర్య మహల్ కూడలి నుంచి బాపూజీ కళా మందిరం వరకు భాషా చైతన్యయాత్ర కొనసాగింది.
ఇదిలా ఉంటే... విజయనగరం పట్టణంలో తెలుగు భాషా సంస్కృతి చైతన్య యాత్రను ఘనంగా నిర్వహించారు. ఈ యాత్రను కలెక్టర్ జి. రామనారాయణ రెడ్డి జెండా ఊపి ప్రారంభించారు. యార్లగడ్డ లక్ష్మీప్రసాద్, అధికార భాషా సంఘం అధ్యక్షుడు ఏబీకే ప్రసాద్, గజల్ శ్రీనివాస్ తదితరులు ఈ కార్యక్రమానికి హాజరైనారు. యార్లగడ్డ మాట్లాడుతూ... పతి పాఠశాలలోనూ విధిగా తెలుగు భాష బోధన అమలు జరిగేలా ప్రభుత్వం చిత్తశుద్ధితో కృషి చేయాలని వ్యాఖ్యానించారు.
