శ్రీలంకలో ఎమర్జెన్సీ విధించారు. సోమవారం అర్థరాత్రి ఇది అమల్లోకి వచ్చింది. ఆ దేశ రాజధాని కొలంబోలో ఆదివారం వరుస బాంబు పేలుళ్లు చోటుచేసుకున్నాయి. సోమవారం కూడా మరో బాంబు పేలుడు సంభవించింది. భద్రతా బలగాలు గుర్తించిన బాంబును నిర్వీర్యం చేస్తుండగా, ఈ బాంబు పేలింది. కొలంబో బస్టాండుకు సమీపంలో మరో 87 డిటోనేటర్లను గుర్తించారు.
కాగా, ఆదివారం ఈస్టర్ సందర్భంగా శ్రీలంకలోని చర్చిల్లో జరిగిన బాంబు పేలుళ్ల తర్వాత ప్రభుత్వం ఈ చర్య చేపడుతోంది. ఈ వరుస పేలుళ్లలో ఇప్పటివరకు 290 మంది చనిపోయారు. మరో 500 మందికి పైగా గాయపడ్డారు. ఈ పేలుళ్లలో 6 భారతీయ పౌరులు సహా 35 మంది విదేశీయులు ఉన్నారు.
ఇదిలావుంటే చర్చిలు, హోటళ్లలో వరుసగా జరిగిన బాంబు పేలుళ్ల కేసులో శ్రీలంక పోలీసులు ఇప్పటి వరకు 24 మందిని అరెస్ట్ చేశారు. అరెస్ట్ చేసిన వారి సమాచారాన్ని బహిర్గత పరచలేదు. వీరిలో 13 మందిని కొలంబో, చుట్టుపక్కల రెండు ప్రదేశాల నుంచి అరెస్టు చేసినట్టు తెలుస్తోంది. దశాబ్దం క్రితం ఎల్టీటీఈ అంతంతో పాటు ముగిసిందనుకున్న రక్తపాత పోరాటం తర్వాత ఈ వరుస పేలుళ్లు మరోసారి శ్రీలంకలో శాంతిని భంగం చేశాయి.
