శ్రీ కృష్ణ జయంతి 2023 తేదీ సెప్టెంబర్ 6న దేశ వ్యాప్తంగా జరుపుకుంటారు. పంచాంగకర్తలు కృష్ణాష్టమిని ఆరోతేదీనే జరుపుకోవాలని సూచిస్తున్నారు. ఈ పండుగను గోకులాష్టమి, కృష్ణాష్టమి అని కూడా అంటారు. కృష్ణ జన్మాష్టమిని ప్రపంచవ్యాప్తంగా వివిధ రకాలుగా జరుపుకుంటారు. వైష్ణవ ఆలయాలు ఉన్న చోట, వేడుకలు ఉదయాన్నే ప్రారంభమవుతాయి.
ఈ రోజున ఉపవాసం ఉంటారు. ధూపం వేస్తారు, భగవద్గీత చదువుతారు. వచ్చే వారం కృష్ణ జయంతి రాబోతున్నందున, కృష్ణ జయంతిని ఎలా పూజించాలో చూద్దాం.
కృష్ణాష్టమి నాడు భక్తులు పగలంతా ఉపవాసం ఉండి, సాయంకాలం శ్రీకృష్ణుని పూజిస్తారు. శ్రావణ మాసంలో లభించే పళ్ళు, శొంఠి, బెల్లం కలిపిన వెన్న, పెరుగు, మీగడ స్వామికి నైవేద్యం పెడతారు. ఊయలలు కట్టి అందులో శ్రీకృష్ణ విగ్రహాల్ని పడుకోబెట్టి ఊపుతూ రకరకాల పాటలు, కీర్తనలు పాడతారు. పుర వీధుల్లో ఎత్తుగా ఉట్లు కట్టి పోటీపడి వాటిని కొడతారు. అందుకే ఈ పండుగని ఉట్ల పండుగ లేదా ఉట్ల తిరునాళ్ళు అని పిలుస్తారు.
భక్తిశ్రద్ధలతో శ్రీకృష్ణ జయంతి వ్రతంగా ఆచరిస్తే గోదానం చేసిన ఫలితం, కురుక్షేత్రంలో సువర్ణదానం చేసిన ఫలం దక్కుతుందని బ్రహ్మాండ పురాణం చెప్పింది. కలియుగంలో కల్మషాల్ని హరించి, పుణ్యాల్ని ప్రసాదించే పర్వదినం ఇదని కూడా వివరించింది.
