టోర్నీ చరిత్రలో ఇలా మొత్తం 13 సార్లు డకౌటై ఓ అనవసరపు రికార్డును తన ఖాతాలో వేసుకున్నాడు. ఇంతకుముందు హర్భజన్ సింగ్‌, పార్థివ్‌ పటేల్‌ ఇలాగే 13సార్లు డకౌటయ్యారు. హిట్‌మ్యాన్‌ ఇప్పుడు వారి సరసన చేరిపోయాడు.
టాస్‌ ఓడి బ్యాటింగ్‌కు దిగిన ముంబయికి ఆదిలోనే దిల్లీ స్పిన్నర్‌ రవిచంద్రన్‌ అశ్విన్‌ షాకిచ్చాడు. డేనియల్‌ సామ్స్‌ వేసిన తొలి ఓవర్‌లో డికాక్‌ మూడు బౌండరీలు బాది 15 పరుగులు సాధించగా శ్రేయస్‌ అయ్యర్‌ రెండో ఓవర్‌ను అశ్విన్‌కు అప్పగించాడు. మళ్లీ రెండు బంతులాడిన డికాక్‌ సింగిల్‌ తీయడంతో రోహిత్‌ మూడో బంతిని ఎదుర్కొన్నాడు. అయితే, అది అనూహ్యంగా ఎల్బీగా నమోదయ్యింది.
ఇక ఈ సీజన్‌లో గాయం కారణంగా రోహిత్‌ నాలుగు మ్యాచ్‌లు ఆడలేకపోయిన సంగతి తెలిసిందే. కీరన్‌ పొలార్డ్‌ జట్టును ముందుండి నడిపించాడు. కానీ, లీగ్‌ దశలో హైదరాబాద్‌తో తలపడిన చివరి మ్యాచ్‌లో హిట్‌మ్యాన్‌ బరిలోకి దిగి విఫలమయ్యాడు. కేవలం 4 పరుగులే చేశాడు. ఇప్పుడు మరోసారి విఫలమవడంతో అతడి ఫామ్‌పై సందేహాలు వ్యక్తమవుతున్నాయి. ఢిల్లీపై విజయం సాధించిన ముంబై ఫైనల్‌ చేరగా అక్కడైనా రోహిత్‌ చెలరేగాలని అభిమానులు ఆశిస్తున్నారు.
