ఢిల్లీ అసెంబ్లీకి జరిగిన ఎన్నికలను తాము ప్రతిష్టాత్మకంగా తీసుకోలేదని కాంగ్రెస్ పార్టీ జాతీయ అధికార ప్రతినిధులు సెలవిస్తున్నారు. ఎందుకంటే.. తాము సీరియస్‌గా ప్రచారం చేసివున్నట్టయితే తప్పకుండా ఓట్లు చీలిపోయి అంతిమంగా భారతీయ జనతా పార్టీకి లబ్ది చేకూరివుండేదని వ్యాఖ్యానిస్తున్నారు. ఇపుడు తాము తీసుకున్న నిర్ణయంతో బీజేపీ అధికారంలోకిరాకుండా అడ్డుకోవడంతో ఆప్ విజయభేరీ మోగించనుందని వారు తమదైనశైలిలో వివరణ ఇస్తున్నారు.
ఈ ఎన్నికల ట్రెండ్‌పై కాంగ్రెస్ ప్రతినిధులు స్పందించారు. ముఖ్యంగా, ఎగ్జిట్ పోల్స్ ఫలితాలు వెల్లడైన వెంటనే వారు స్పందించారు. ఈ దఫా కూడా ఆప్‌దే విజయమని తాము అంచనా వేశామని తెలిపారు. తాము కావాలనే ఎన్నికల్లో భారీగా ప్రచారం చేయలేదనీ, ఒకవేళ అలా చేస్తే ఓట్లు చీలిపోయి పరిస్థితి బీజేపీకి అనుకూలంగా మారే అవకాశం ఉందని చెప్పుకొచ్చారు.
అయితే, ఢిల్లీలో కాంగ్రెస్ పార్టీకి చెప్పుకోదగిన నేత కనిపించడం లేదు. మాజీ ముఖ్యమంత్రి షీలా దీక్షిత్ చనిపోయిన తర్వాత ఆ లోటు ఢిల్లీ కాంగ్రెస్‍‍లో కొట్టొచ్చినట్టు కనిపిస్తోంది. నిజానికి షీలా దీక్షిత్ ఉన్న సమయంలో కాంగ్రెస్ పార్టీ మూడు సార్లు అంటే 15 యేళ్ల పాటు ఢిల్లీ పీఠాన్ని పాలించింది.
