తాజాగా వెలుగులోకి వచ్చిన ఈ వివరాలను పరిశీలిస్తే, గంజాం జిల్లాకు చెందిన ఓ యువకుడు ఈ నెల 2వ తేదీన తన వివాహాన్ని అంగరంగ వైభవంగా నిర్వహించారు. పెద్ద సంఖ్యలో అతిథులను కూడా ఆహ్వానించాడు. ఇందులో పాల్గొన్న వారు ఒక్కరు కూడా మాస్కు ధరించలేదు సరికదా, భౌతిక దూరాన్ని గాలికి వదిలేసి డ్యాన్సులతో హోరెత్తించారు. ఆ తర్వాత వారందరితో కలిసి పెళ్లి ఊరేగింపు నిర్వహించాడు. ఇలా చేయడం కోవిడ్ నిబంధనలకు విరుద్ధం.
ఇందుకు సంబంధించిన వీడియోను సోషల్ మీడియాలో పోస్టు చేయడంతో వైరల్ అయింది. ఇది కాస్తా అధికారుల దృష్టికి చేరడంతో తీవ్రంగా పరిగణించిన అధికారులు వివాహం జరిగిన 'హోటల్ మై ఫెయిర్'ను సీజ్ చేయడంతోపాటు వరుడు, అతడి తండ్రి, ముగ్గురు మామయ్యలను అరెస్టు చేశారు. అలాగే, పెళ్లి ఊరేగింపులో పాల్గొన్న రెండు వాహనాలను సీజ్ చేసినట్టు గంజాం ఎస్పీ పినాక్ మిశ్రా తెలిపారు. వారిపై వివిధ సెక్షన్ల కింద కేసు నమోదు చేసినట్టు వివరించారు.
