అయితే మోదీని రాహుల్ ఆలింగనం చేసుకోవడం.. అనుకోకుండా జరగలేదని.. మూడు నెలల పాటు ఇందుకు ప్లాన్ జరిగిందని టాక్. దేశమంతా గుర్తించేలా ఏదైనా పనిచేయాలని, అందులో ప్రధానిని కూడా భాగం చేయాలని ఆయన ఆలోచించి, ఈ పని చేశారని కాంగ్రెస్ నేతలు అంటున్నారు.
ముఖ్యంగా గాంధీ కుటుంబాన్ని, తన తల్లిని పదే పదే విమర్శలు చేస్తున్న ప్రధానికి రాహుల్ గాంధీ ఆలింగనం ద్వారా నిరసన తెలిపారని కాంగ్రెస్ నేతలు చెప్తున్నారు. ఆయన తన ఆలింగనం ద్వారా ప్రధానిని ఆశ్చర్యపోయేటట్టు చేశారని అందరూ భావిస్తున్నారని, కానీ ఈ విషయంలో రాహుల్ టైమింగ్ మాత్రం ప్రధానితో తలపడటాన్నే సూచిస్తోందన్నారు. వాస్తవానికి ప్రధాని మాట్లాడే సమయంలోనో లేదా తన ప్రసంగం మధ్యలోనో ఆలింగనం చేసుకోవాలనుకున్నారు. కానీ ప్రసంగం ముగిసిన తర్వాత ఆ పని చేశారని కాంగ్రెస్ నేతలు చెప్పుకుంటున్నారు.
ఇదిలా ఉంటే రాహుల్ కౌగిలింత స్పూర్తిగా కాంగ్రెస్ శ్రేణులు ఢిల్లీలోని కన్నాట్ ప్లేస్‌లో ఉచిత కౌగిలింత (ఫ్రీ హగ్) కార్యక్రమాన్ని ప్రారంభించాయి. ఈ కార్యక్రమంలో భాగంగా కోరుకున్న వారికి కౌగిలింత ఇచ్చిన కాంగ్రెస్ కార్యకర్తలు ''విద్వేషాన్ని తుడిచేద్దాం'', ''ద్వేషానికి నో చెబుదాం'', ''దేశాన్ని కాపాడుదాం'' పేరుతో ప్లకార్డుల్ని ప్రదర్శించారు.
మరోవైపు లోక్‌సభలో ప్రధాని మోదీని ఆలింగనం చేసుకోవడం కాదని, దమ్ముంటే తనను ఆలింగనం చేసుకోవాలని కాంగ్రెస్ చీఫ్ రాహుల్ గాంధీకి ఉత్తరప్రదేశ్ ముఖ్యమంత్రి యోగి ఆదిత్యనాథ్ సవాలు విసిరారు. తనను హత్తుకోవాలంటే ఒకటికి పదిసార్లు ఆలోచించుకోవాలని అన్నారు. రాహుల్ హగ్ ఓ పొలిటికల్ స్టంట్ అని కొట్టిపడేశారు. అతడివి పిల్ల చేష్టలని యోగి కొట్టిపారేశారు. రాహుల్‌కు హుందాతనం, తెలివి తేటలులేవని, అందుకే ఇలా ప్రవర్తించారని విమర్శించారు.
