నిత్యం మద్యం సేవించి తనను దుర్భాషలాడుతూ, వేధిస్తుండటంతో తన తండ్రి వద్ద డ్రైవర్‌గా పనిచేసే వ్యక్తిని నడిరోడ్డుపై మోకాళ్లపై కూర్చోబెట్టి ఓ మహిళ చెప్పుతో కొట్టింది. ఈ మహిళ ఎవరో కాదు.. అస్సాం మాజీ ముఖ్యమంత్రి ప్రఫుల్ కుమార్ మహంత కుమార్తె. ఈ సంఘటనకు సంబంధించిన ఓ వీడియో ఇపుడు నెట్టింట వైరల్ అవుతుంది. ఆ వీడియోలో ఆమె ఓ వ్యక్తిని మోకాళ్లపై కూర్చోబెట్టి చెప్పుతో కొట్టడం కనిపిస్తుంది. దీస్‌పూర్‌లోని ఎమ్మెల్యే గెస్ట్ హౌస్‌లో సోమవారం ఈ సంఘటన చోటుచేసుకుంది.
సదరు వ్యక్తి తన తండ్రి వద్ద గత కొన్నేళ్లుగా డ్రైవర్‌గా పని చేస్తున్నాడు. నిత్యం మద్యం మత్తులో ఉండే అతడు తనతో దుర్భాషలాడుతూ దురుసుగా ప్రవర్తించేవాడని ఆమె ఆరోపించారు. ఈ విషయంపై పలుమార్లు అతడిని హెచ్చరించినప్పటికీ, అతని ప్రవర్తనలో మార్పు రాలేదన్నారు.
సోమవారం కూడా పీకల వరకు మద్యం సేవించివచ్చి తన ఇంటి తలుపులు కొట్టాడని ఆమె తెలిపారు. అందుకే ఇలా దేహశుద్ధి చేయాల్సి వచ్చిందని చెప్పారు. అయితే, సదరు డ్రైవరుపై ఇన్నాళ్లూ ఎందుకు పోలీసులకు ఫిర్యాదు చేయలేదనే ప్రశ్నలు ఉత్పన్నమవుతున్నాయి. ఒక మాజీ ముఖ్యమంత్రి వద్ద పని చేసే కారు డ్రైవర్, ఆ మాజీ సీఎం కుమార్తె పట్ల ఇలా ప్రవర్తిస్తాడా అనే సందేహం ఉత్పన్నమవుతుంది.
