భర్త వేధిస్తోంటే పుట్టింటికి వెళ్లిన మహిళలను చూసి వుంటారు. భర్తతో కలిసి జీవించడం ఇష్టం లేకపోతే విడాకులు తీసుకుని తన మానాన తాను బతికే మహిళల గురించి కూడా విని ఉంటారు. కానీ ఓ మహిళ ఊహించని రీతిలో భర్తపై దాడి చేసింది. అతడిని తీవ్రంగా గాయాల పాలు చేసింది. కన్నకూతురితో కలిసి ఆమె చేసిన పనికి ఆ భర్త ఆసుపత్రిలో చికిత్స పొందుతున్నాడు. నొప్పులు భరించలే తీవ్ర ఆవేదన వ్యక్తం చేస్తున్నాడు. సింపుల్‌గా ఇంట్లో ఉన్న ఓ లీటర్ నూనెను సలసలా మరిగించి భర్తమీద పోసింది. అంతే కాదు ఆ తర్వాత వెంటనే అతడి శరీరంపై కారం చల్లింది.
నూనె వేడికి బొబ్బలు రావడం, చర్మం ఊడటం, అలా చర్మం ఊడిన శరీరంపై కారం పడటం.. ఇక చూసుకోండి అతడి బాధ వర్ణనాతీతం. హైదరాబాద్ నడిబొడ్డున జరిగిన ఈ ఘటనకు సంబంధించిన పూర్తి వివరాల్లోకి వెళితే.. హుస్నాబాద్‌కు చెందిన 44 ఏళ్ల సదయ్య, రజిత దంపతులు కుమార్తెతో కలిసి జగద్గిరిగుట్ట పరిధిలోని దీనబంధు కాలనీలో నివాసం ఉంటున్నారు.
సదయ్య జీవనోపాధి కోసం కూరగాయలు అమ్ముతూ ఉంటుంటారు. మంగళవారం సాయంత్రం కూడా అలా కూరగాయలు అమ్మేందుకు వెళ్లి రాత్రి పొద్దుపోయాక ఇంటికి తిరిగి వచ్చాడు. అప్పటికే ఇంట్లో భార్య, కూతురు ఉన్నారు. ఇంటి ప్రహరీకి ఉన్న గేటుకు తాళం వేశారు. తాళం తీయమని ఎన్నిసార్లు భార్యా కుమార్తెకు చెప్పినా తీయలేదు. ఇంట్లోనే ఉండి కూడా ఏమాత్రం స్పందించలేదు. దీంతో పక్కింటిలోకి వెళ్లి గోడ దూకి తన ఇంట్లోకి చేరుకున్నాడు.
