బాహుబలి భల్లాలదేవుడు రానా దగ్గుబాటి సివిల్ కేసు కోసం కోర్టుకు హాజరయ్యారు. వివరాల్లోకి వెళ్తే... ఫిలింనగర్‌ కో-ఆపరేటివ్‌ సొసైటీలో ప్లాట్‌ నెం. 2 సినీ నటి మాధవి (మాతృదేవోభవ హీరోయిన్‌)కు సొసైటీ కేటాయించింది. అయితే ఆమె 2200 గజాల ప్లాట్‌ను సినీ నిర్మాత సురేష్‌ దగ్గుబాటి, వెంకటేశ్‌కు విక్రయించి వెళ్లిపోయింది. సదరు స్థలంలో వెయ్యి గజాలు నిర్మాత సురేష్‌ దగ్గుబాటి పేరు మీద, 1200 గజాలు హీరో వెంకటేష్‌ పేరున ఉన్నాయి.
2014లో ఈ స్థలంలోని రెండు ప్లాట్లను ఎమ్మెల్యే కాలనీకి చెందిన నందకుమార్‌ అనే వ్యాపారికి లీజు అగ్రిమెంట్‌ చేశారు. నెలకు రూ. 2 లక్షలు చెల్లించే విధంగా ఈ రెండు ప్లాట్లను లీజు అగ్రిమెంట్‌చేయగా 2014లో ఒకసారి, 2016లో మరోసారి లీజు రెన్యూవల్‌ జరిగింది.
అయితే ఈ ప్లాట్‌కు డిమాండ్‌ ఎక్కువగా ఉండటంతో వేరే వ్యాపారి వచ్చి ఎక్కువ డబ్బులు ఇస్తానని చెప్పడంతో నందకుమార్‌ అగ్రిమెంట్‌ను పక్కన పెట్టి మరో వ్యక్తికి సేల్‌ ఆఫ్‌ అగ్రిమెంట్‌ చేశారు. 2017లో ఈ ఒప్పందం ఉల్లంఘించగా నందకుమార్‌ కోర్టును ఆశ్రయించాడు. ఒకరికి తెలియకుండా మరొకరికి దగ్గుపాటి సురేష్‌ ఈ సేల్‌ అగ్రిమెంట్‌చేసినట్లుగా కోర్టులో పిటిషన్‌ దాఖలైంది.
