నందమూరి కుటుంబంతో సినీ హీరో మోహన్ బాబుకు ఉన్న పరిచయం, అనుబంధం గురించి ప్రత్యేకంగా చెప్పనక్కర్లేదు. ఆ కుటుంబానికి పెద్ద దిక్కుగా ఉన్న హరికృష్ణ మరణవార్త మోహన్ బాబును తీవ్రంగా కలిసివేసింది. ఆయన మరణం పట్ల దిగ్భ్రాంతిని వ్యక్తం చేశారు. తన సోదరుడిని కోల్పోయానని, ఏం చెప్పాలో, ఏం మాట్లాడాలో కూడా అర్థం కావడం లేదన్నారు. తన జీవితంలో అత్యంత విలువైనదాన్ని కోల్పోయాను అంటూ ఆవేదన వ్యక్తంచేశారు. హరికృష్ణ మరణంతో ఆయన కన్నీటిపర్యంతం అయ్యారు. ఇంతకుమించిన లోటు తనకు మరేదీ లేదన్నారు.
సినీ హీరో నందమూరి హరికృష్ణ మృతిపై జనసేన పార్టీ అధినేత, పవర్ స్టార్ పవన్ కల్యాణ్ తీవ్ర దిగ్భ్రాంతిని వ్యక్తం చేశారు. ఈ మేరకు ఆయన తన ట్విట్టర్ ఖాతాలో స్పందించారు. హరికృష్ణ ప్రమాదానికి గురయ్యారని తెలియగానే గాయాలతో బయటపడతారని భావించానని, ఆ వెంటనే విషాద వార్త వినాల్సి వచ్చిందని పవన్ వ్యాఖ్యానించారు.
సినీ, రాజకీయ రంగాల్లో ఆయన చేసిన సేవలు మరచిపోలేనివని వ్యాఖ్యానించిన పవన్, హరికృష్ణ ఆత్మకు శాంతి కలగాలని కోరుకుంటున్నట్టు తెలిపారు. ఈ విషాద సమయంలో ధైర్యంగా ముందుకు వెళ్లే శక్తిని ఆయన కుటుంబ సభ్యులకు భగవంతుడు ఇవ్వాలని, తన తరపున, జనసేన శ్రేణుల తరపున ఆయనకు నివాళులు అర్పిస్తున్నానని అన్నారు.
