తన ప్రియుడ్ని న‌టి పూర్ణ బేక్‌డోర్ నుంచి ఆహ్వానిస్తుంది. అత‌ను రాగానే మొద‌టిసారైనా ఏదో తెలియ‌ని అనుభూతి అంటుంది. అత‌ను పూర్ణ‌ను మ‌రింత ద‌గ్గ‌ర‌గా తీసుకుంటూ `న‌న్ను ఎందుకు పిలిచావ్‌. ఏం చెప్ప‌బోతున్నావ్‌.. ఆశ పెట్టి తీర్చ‌క‌పోతే చాలా పాపం తెలుసా! అంటూ బ‌దులిస్తాడు. ఇలా ఆస‌క్తిగా సాగే టీజర్ పూర్ణ న‌టించిన బ్యాక్‌డోర్ సినిమాలోనిది. టీజ‌ర్‌ను హైద‌రాబాద్‌లో ప్రముఖ నిర్మాతలు కె.ఎస్.రామారావు, కె.ఎల్.దామోదర్ ప్రసాద్, రాజ్ కందుకూరి, తుమ్మలపల్లి రామసత్యనారాయణ ఆవిష్క‌రించారు. విభిన్నమైన కాన్సెప్ట్ తో రూపొందిన "బ్యాక్ డోర్" టీజర్ చాలా బాగుందని, దర్శకుడు బాలాజీ ప్రతిభ ప్రతి ఫ్రేమ్ లోనూ కనిపించిందని, ఇప్పటికే నంది అవార్డు గెలుచుకున్న బాలాజీ 'బ్యాక్ డోర్'తో మరిన్ని అవార్డులు గెలుచుకోవాలననీ, పూర్ణ కెరీర్ లో మరో మంచి హిట్ ఫిల్మ్ అయ్యే అవకాశాలు పుష్కలంగా ఉన్నాయని అతిధులు ఆకాంక్షించారు.
