హైదరాబాద్ పెట్రోల్ బంకుల్లో ఇకపై ట్రాన్స్‌జెండర్లు పనిచేయనున్నారు. సమాజంలో ఎన్నో ఇబ్బందులు ఎదుర్కొంటున్న వీరు భిక్షాటన, వ్యభిచారం వంటి వృత్తులను ఆశ్రయిస్తున్నారు. అయితే జైళ్ల శాఖ పుణ్యంతో లింగమార్పిడి వ్యక్తులకు మంచిరోజులు వస్తున్నాయి. తెలంగాణ జైళ్ల శాఖ ట్రాన్స్‌జెండర్లకు ఉపాధి కల్పించేందుకు రంగం సిద్ధం చేసింది.
ఈ ఏడాది ఆఖరు కల్లా జైళ్ల శాఖ రాష్ట్రంలో మొత్తం వంద పెట్రోల్ పంపులను నిర్వహించేందుకు లక్ష్యంగా పెట్టుకుంది. వాటిలో ఐదింటిని ట్రాన్స్‌జండర్ల కోసం కేటాయించినట్లు జైళ్లు-పరివర్తన సేవల డైరెక్టర్ జనరల్ వీకే సింగ్ తెలిపారు. అలాగే జైలు ఖైదీలు తయారు చేస్తున్న ఉత్పత్తుల విక్రయం కోసం త్వరలోనే వెయ్యి విలేజ్ అవుట్‌లెట్లను ప్రారంభించనున్నట్లు వెల్లడించారు.
