ఆంధ్రప్రదేశ్ అసెంబ్లీ ఎన్నికలు సమీపిస్తున్న తరుణంలో తెలుగుదేశం పార్టీ, జనసేన పార్టీ, భారతీయ జనతా పార్టీల మధ్య పొత్తుల విషయంలో గందరగోళం నెలకొంది. ఎన్నికలకు ముందు పొత్తులపై ఇంకా స్పష్టమైన ప్రణాళిక లేదని పేర్కొంటూ జనసేన పార్టీ అధినేత పవన్ కళ్యాణ్ శుక్రవారం అనిశ్చితిని పెంచారు. విశాఖపట్నంలో ఆయన మాట్లాడుతూ.. పొత్తులపై చర్చలు కొనసాగుతున్నాయని పేర్కొన్నారు.
ఏర్పాటు అయ్యే ప్రభుత్వం ఏదైనా సరే కానీ ప్రస్తుత ప్రభుత్వాన్ని మార్చే విధంగా మాత్రం పొత్తులు ఉంటాయంటూ మరొక్క సారి తన ఉద్దేశాన్ని స్పష్టం చేశారు. ఒకవేళ సంకీర్ణ పార్టీలతో సంకీర్ణ ప్రభుత్వం వస్తే ఎన్నికలు అయ్యాక శాసనసభ్యుల నిర్ణయం మేరకు ముఖ్యమంత్రి నిర్ణయం ఉంటుందనీ, ఆ సంకీర్ణ ధర్మాన్ని పాటించాలని తాను అనుకుంటున్నట్టు మరింత స్పష్టత ఇచ్చారు పవన్.
