మరికొన్ని గంటల్లో పెళ్లి జరగాల్సివుంది. ఇంతలో పెళ్లికి వచ్చిన అమ్మలక్కలు వరుడు ముక్కు చిన్నదిగా ఉందంటూ గుసగుసలాడుకోసాగారు. ఈ విషయం వధువు చెవిలో పడింది. అంతే.. ఈ పెళ్లి తనకు వద్దంటూ వధువు అడ్డం తిరిగింది. ఇరు కుటుంబాల సభ్యులు ఎంత చెప్పినప్పటికీ వధువు వినిపించుకోలేదు. దీంతో పెళ్లి రద్దు అయింది. ఈ ఘటన ఉత్తరప్రదేశ్ రాష్ట్రంలోని సంభాల్ జిల్లాలో వెలుగు చూసింది.
తాజాగా వెలుగు చూసిన ఈ ఘటన వివరాలను పరిశీలిస్తే, జిల్లాలోని ఓ గ్రామానికి చెందిన యువతీయువకులకు పెళ్లి చేయాలని ఇరు కుటుంబాల సభ్యులతో పాటు గ్రామ పెద్దలు కూడా నిర్ణయించారు. బుధవారం పెళ్లి జరగాల్సి వుంది. ఇందుకోసం వధువు ఇంటికి వరుడు కుటుంబ సభ్యులు ఊరేగింపుగా వచ్చారు. పెళ్లికి వచ్చిన వారితో వధువు ఇల్లు సందడిగా మారింది.
ఈ క్రమంలో పెళ్లికి వచ్చిన అమ్మలక్కలతో పాటు ఇరుగుపొరుగువారు, బంధువులు వరుడిని చూసి వరుడు బాగానే ఉన్నాడుకానీ ముక్కు చిన్నదిగా ఉందంటూ గుసగుసలాడటం మొదలు పెట్టారు. ఈ మాటలు వధువు చెవినపడ్డాయి. వారి మాటలు నిజమో కాదో తెలుసుకునేందుకు వధువు నేరుగా వరుడు వద్దకు వెళ్లి ముక్కును చూసింది.
