ఆంధ్రప్రదేశ్ రాష్ట్రంలో ముఖ్యమంత్రిగా జగన్మోహన్ రెడ్డి బాధ్యతలు స్వీకరించిన తర్వాత వివిధ రకాలుగా మోసపోయిన అమ్మాయిలు, మహిళలకు భరోసా ఇచ్చేందుకు వీలుగా స్పందన కార్యక్రమాన్ని ప్రారంభించారు. ఈ కార్యక్రమానికి పలువురు బాధితులు వచ్చి తమ గోడును వెళ్లబోసుకుంటున్నారు.
తాజాగా ఓ యువతి ప్రేమికుడు చేతిలో మోసపోయింది. ఈ విషయాన్ని స్పందన కార్యక్రమంలో బహిర్గతం చేసింది. తన తోపుడు బండి పక్కనే మరో బండిపై చికెన్ పకోడీ అమ్ముకునే యువకుడు, నిత్యమూ తనకు చికెన్ పెట్టి, ఆపై ప్రేమిస్తున్నానని చెబితే, నమ్మి మోసపోయానని వాపోయింది. ఈ మేరకు ఆమె ఇచ్చిన ఫిర్యాదును పరిశీలిస్తే,
గుంటూరు జిల్లా చేబ్రోలు మండలానికి చెందిన ఓ యువతి 7వ తరగతి వరకూ చదువుకుంది. ఆమె తండ్రి వికలాంగుడు. కుటుంబ పోషణార్థం, ఆడవారి అలంకరణ వస్తువులను తోపుడు బండిపై పెట్టుకుని అమ్ముతూ కుటుంబాన్ని పోషిస్తూ వచ్చింది. ఈ క్రమంలో ఆమె బండి పక్కనే అదే ప్రాంతానికి చెందిన ఓ యువకుడు మరో తోపుడు బండిపై చికెన్ పకోడీ వ్యాపారం చేస్తున్నాడు. పక్కనే ఉంటూ స్నేహంగా మెలగడంతో, ఆమె కూడా తరచూ మాట్లాడేది.
ఈ క్రమంలో నిత్యమూ పకోడీలు పెట్టిన అతను, ప్రేమిస్తున్నానని చెప్పాడు. పెళ్లాడతానని మభ్య పెట్టాడు. నువ్వు లేకపోతే చనిపోతానంటూ నమ్మించాడు. దీంతో ఆ యువతి కూడా ప్రేమలో పడిపోయింది. ఆమెను పెదకాకానికి తీసుకెళ్లిన అతను, గుడిలో తాళి కట్టి, పెళ్లయి పోయిందంటూ, ఓ గది తీసుకుని కాపురం పెట్టాడు.
ఆపై తనకు అప్పులున్నాయంటూ, బాధితురాలి వద్ద ఉన్న బంగారం, వెండి వస్తువులను తీసుకెళ్లాడు. రెండు నెలల కాపురం తర్వాత యువతి గర్భవతి అయింది. ఈ విషయం తెలుసుకున్న అతను ఆమెను వదిలేసి వెళ్లిపోయాడు. తన భర్తను, అతని తల్లే దాచి పెట్టిందని, ఇప్పుడు మరో పెళ్లి చేయాలని చూస్తోందని ఆరోపించింది. తనకు న్యాయం చేయాలని కోరింది. దీనిపై స్పందించిన అధికారులు, విచారణ జరిపించాలని స్థానిక పోలీసులను ఆదేశించారు.
