ప్రధానమంత్రి నరేంద్ర మోడీ బుధవారం నుండి రెండు రోజుల పర్యటనలో ఆంధ్రప్రదేశ్, ఒడిశాలను సందర్శిస్తారు. స్థిరమైన అభివృద్ధి, పారిశ్రామిక వృద్ధి, మౌలిక సదుపాయాల అభివృద్ధికి ప్రధానమంత్రి మోడీ జనవరి 8 (బుధవారం) సాయంత్రం 5:30 గంటలకు విశాఖపట్నంలో 2 లక్షల కోట్ల రూపాయలకు పైగా విలువైన ప్రాజెక్టులను జాతికి అంకితం చేస్తారు. ఇంకా శంకుస్థాపన చేస్తారు.
జనవరి 9న ఉదయం 10 గంటలకు భువనేశ్వర్‌లో 18వ ప్రవాసీ భారతీయ దివస్ (PBD) సమావేశాన్ని కూడా ఆయన ప్రారంభిస్తారు. గ్రీన్ ఎనర్జీ - స్థిరమైన భవిష్యత్తు పట్ల తన నిబద్ధతకు మరో కీలక అడుగుగా, ప్రధానమంత్రి ఆంధ్రప్రదేశ్‌లోని విశాఖపట్నం సమీపంలోని పూడిమడకలో అత్యాధునిక NTPC గ్రీన్ ఎనర్జీ లిమిటెడ్ గ్రీన్ హైడ్రోజన్ హబ్ ప్రాజెక్టుకు శంకుస్థాపన చేస్తారు.
ఇది నేషనల్ గ్రీన్ హైడ్రోజన్ మిషన్ కింద మొదటి గ్రీన్ హైడ్రోజన్ హబ్. ఈ ప్రాజెక్టుకు దాదాపు రూ.1,85,000 కోట్ల పెట్టుబడి అవసరం. ఇందులో 20 GW పునరుత్పాదక ఇంధన సామర్థ్యాలలో పెట్టుబడి ఉంటుంది. ఇది భారతదేశంలోని అతిపెద్ద ఇంటిగ్రేటెడ్ గ్రీన్ హైడ్రోజన్ ఉత్పత్తి సౌకర్యాలలో ఒకటిగా మారుతుంది.
ఇది 1,500 TPD గ్రీన్ హైడ్రోజన్, 7,500 TPD గ్రీన్ హైడ్రోజన్ ఉత్పన్నాలను ఉత్పత్తి చేసే సామర్థ్యంతో ఉంటుంది. వీటిలో గ్రీన్ మిథనాల్, గ్రీన్ యూరియా, సస్టైనబుల్ ఏవియేషన్ ఫ్యూయల్ ఉన్నాయి. ఇవి ప్రధానంగా ఎగుమతి మార్కెట్‌ను లక్ష్యంగా చేసుకుంటాయి.
ఈ ప్రాజెక్ట్ 2030 నాటికి భారతదేశ శిలాజేతర ఇంధన సామర్థ్య లక్ష్యమైన 500 GWని సాధించడానికి గణనీయంగా దోహదపడుతుంది. ప్రధానమంత్రి ఆంధ్రప్రదేశ్‌లో రూ. 19,500 కోట్లకు పైగా విలువైన వివిధ రైల్వే- రోడ్డు ప్రాజెక్టులను జాతికి అంకితం చేస్తారు. శంకుస్థాపన చేస్తారు. ఇందులో విశాఖపట్నంలో సౌత్ కోస్ట్ రైల్వే ప్రధాన కార్యాలయానికి శంకుస్థాపన, ఇతర ప్రాజెక్టులు ఉన్నాయి.
ఈ ప్రాజెక్టులు రద్దీని తగ్గిస్తాయి, కనెక్టివిటీని మెరుగుపరుస్తాయి. ఇంకా అనకాపల్లి జిల్లాలోని నక్కపల్లి వద్ద బల్క్ డ్రగ్ పార్క్‌కు ప్రధాని మోదీ పునాది వేస్తారు. విశాఖపట్నం-చెన్నై ఇండస్ట్రియల్ కారిడార్ (VCIC), విశాఖపట్నం-కాకినాడ పెట్రోలియం, కెమికల్ - పెట్రోకెమికల్ ఇన్వెస్ట్‌మెంట్ రీజియన్‌కు సమీపంలో ఉండటం వల్ల ఈ బల్క్ డ్రగ్ పార్క్ వేలాది ఉద్యోగాలను సృష్టిస్తుంది. ఆర్థిక వృద్ధిని వేగవంతం చేస్తుంది.
ఆంధ్రప్రదేశ్‌లోని తిరుపతి జిల్లాలో చెన్నై బెంగళూరు ఇండస్ట్రియల్ కారిడార్ కింద కృష్ణపట్నం ఇండస్ట్రియల్ ఏరియా (KRIS సిటీ) కు ప్రధానమంత్రి శంకుస్థాపన చేస్తారు.
