హైదరాబాద్‌లో మరో ఘోరం.. నాలుగేళ్ల చిన్నారిపై నీచం

నగరంలో మరో దారుణ ఘటన జరిగింది. అభంశుభం తెలియని నాలుగేళ్ల చిన్నారిపై నీచానికి పాల్పడ్డాడో కామాంధుడు. స్థానికులు గమనించి నిందితుడిని పట్టుకుని చితకబాది పోలీసులకు అప్పగించారు.

సైదాబాద్‌లో ఆరేళ్ల చిన్నారి హత్యాచార ఘటన మరువక ముందే నగరంలో మరో దారుణ ఘటన వెలుగుచూసింది. కామంతో కళ్లు మూసుకుపోయిన దుర్మార్గుడు అభం శుభం తెలియని నాలుగేళ్ల చిన్నారిపై నీచానికి ఒడిగట్టిన దారుణ ఘటన చోటుచేసుకుంది.

పాతబస్తీలోని ఛత్రినాక పోలీస్ స్టేషనర్ ఏరియా కందికల్ గేట్ క్రాంతి నగర్‌ ప్రాంతానికి చెందిన చిన్న నర్సింగ్(32) అనే యువకుడు అదే ప్రాంతానికి చెందిన నాలుగేళ్ల చిన్నారిపై కన్నేశాడు. ఎవరూ లేని సమయంలో అదను చూసి చాక్లెట్ ఇప్పిస్తానని చిన్నారిని తీసుకెళ్లి దారుణానికి పాల్పడ్డాడు. ఆమెతో అసభ్యంగా ప్రవర్తిస్తుండగా గమనించిన స్థానికులు నర్సింగ్‌ను పట్టుకుని చితకబాదారు.

పోలీసులకు సమాచారం అందించడంతో సంఘటన స్థలానికి చేరుకున్నారు. చిన్నారిపై నీచానికి పాల్పడిన నిందితుడిని స్థానికులు చితక్కొట్టి పోలీసులకు అప్పగించారు. నిందితుడిపై పోక్సో యాక్ట్ కింద కేసు నమోదు చేసి పోలీసులు విచారణ చేపట్టారు. పూర్తి వివరాలు తెలియాల్సి ఉంది."