నిత్యం మద్యంసేవించి ఇంటికి వచ్చి వేధిస్తున్న భర్తకు ఓ భార్య తగిన విధంగా గుణపాఠం చెప్పింది. కట్టుకున్న భర్తకు విడాకులు ఇవ్వకుండానే మరో పెళ్లి చేసుకుంది. లోన్ సొమ్మును వసూలు చేసేందుకు ఇంటికి వచ్చే బ్యాంకు ఏజెంటుని ప్రేమించి పెళ్లి చేసుకుంది. పైగా, ఈ పెళ్లికి ఇరుగుపొరుగువారితో పాటు కుటుంబ సభ్యులను కూడా ఆహ్వానించి, వారందరి సమక్షంలో తాను ఇష్టపడిన వ్యక్తితో తాళికట్టించుకుంది. ఈ సంఘటన బీహార్ రాష్ట్రంలోని పాట్నాలో జరిగింది. తాజాగా వెలుగులోకి వచ్చిన ఈ వివరాలను పరిశీలిస్తే,
పాట్నాకు చెందిన ఇంద్రకుమారి అనే మహిళకు నకుల్ శర్మ అనే వ్యక్తితో గత 2022లో వివాహం జరిగింది. అయితే, నకుల్ శర్మకు మద్యం సేవించే అలవాటు ఉండటంతో నిత్యం మద్యం సేవించి వచ్చి భార్యను చిత్రహింసలకు గురిచేస్తూ వచ్చాడు. ఈ వేధింపులను భరించలేని ఇంద్రకుమారి తన తల్లిదండ్రులకు తన పరిస్థితిని వివరిస్తూ వచ్చింది. కానీ, వారుమాత్రం సర్దుకునిపోతూ సంసార జీవితాన్ని గడపాలని సూచించారు. అయితే, ఇంద్రకుమారి మాత్రం నకుల్ శర్మతో ఉండేందుకు ఏమాత్రం ఇష్టపడలేదు.
ఈ క్రమంలో నకుల్ శర్మ బ్యాంకు లోను తీసుకోగా, ఆ డబ్బులను వసూలు చేసేందుకు ఇంటికి వచే పవన్ కుమార్ యాదవ్‌తో ఇంద్ర కుమారికి పరిచయం ఏర్పడింది. ఈ పరిచయం కాస్త వారి మధ్య ప్రేమకు దారితీసింది. పవన్ వద్ద తన గోడును ఇంద్ర కుమారి వెళ్లబోసుకుంది. పైగా, తన భర్తతో కలిసివుండలేనని తెగేసి చెప్పింది. దీంతో పవన్, ఇంద్ర కుమారిలు పెళ్లి చేసుకోవాలని నిర్ణయం తీసుకున్నారు. ఓ రోజున ఇంద్రకుమారిని తనతో విమానంలో వెస్ట్ బెంగాల్ రాష్ట్రంలో ఉన్న తన అత్త ఇంటికి తీసుకెళ్లాడు. ఆ తర్వాత పెళ్లిపత్రికలు ముద్రించి ఈ నెల 11వ తేదీన తన వివాహాన్ని ఘనంగా నిర్వహించారు.
ఈ వివాహానికి ఇంద్రకుమారి తన కుటుంబ సభ్యులు, బంధుమిత్రులను ఆహ్వానించింది. ఈ విషయం కాస్త సంచలనం కావడంతో చుట్టుపక్కల గ్రామాల వారు కూడా ఈ పెళ్లిని చూసేందుకు వచ్చారు. అయితే, ఇంద్రకుమారి తల్లిదండ్రులకు ఈ పెళ్లి ఏమాత్రం ఇష్టంలేకపోవడంతో పోలీసులను ఆశ్రయించారు. పోలీసులు కేసు నమోదు చేసి విచారించగా, ఈ పెళ్లిని తన ఇష్టప్రకారం చేసుకుంటున్నానని చెప్పింది. దీంతో వారు కూడా చేసేదేమిలేక వెనుదిరిగారు. కాగా, ఈ వివాహానికి సంబంధించిన వీడియో ఒకటి సోషల్ మీడియాలో వైరల్ అయింది.
