హీరోగా, దర్శకుడిగా, నిర్మాతగా, సంగీత దర్శకుడిగా, ఎడిటర్‌గా ప్రజ్ఞను ప్రదర్శించే విజయ్ ఆంథోనీ ఈసారి నిర్మాతగా, హీరోగా, సంగీత దర్శకుడిగా 'మార్గన్' చిత్రంతో ప్రేక్షకుల ముందుకు వచ్చారు. లియో జాన్ పాల్ దర్శకత్వం వహించిన ఈ సినిమా ద్వారా తన మేనల్లుడు అజయ్ ధీషన్‌ను పరిచయం చేశారు. ఈ థ్రిల్లర్ ప్రేక్షకులను ఎంతవరకు ఆకట్టుకుందో తెలుసుకుందాం.
కథ:
నగరంలో రమ్య అనే యువతి అత్యంత దారుణంగా హత్య కాబడుతుంది. ఆమె శరీరమంతా ఒక ఇంజెక్షన్ కారణంగా నల్లగా మారి చనిపోతుంది. ఈ కేసును దర్యాప్తు చేసే బాధ్యత పోలీస్ ఆఫీసర్ ధృవ (విజయ్ ఆంటోనీ)కు అప్పగిస్తారు. సరిగ్గా తొమ్మిదిన్నరేళ్ల క్రితం, తన కూతురు ప్రియ కూడా ఇదే రీతిలో చనిపోతుంది. ఆ హంతకులను పట్టుకునే ప్రయత్నంలో ధృవ శరీరం కూడా సగం నల్లగా మారిపోతుంది.
ధృవ దీన్ని వ్యక్తిగత సవాలుగా స్వీకరిస్తాడు. తన కూతురిలా ఇంకెవరూ బలి కాకూడదని సంకల్పిస్తాడు. ఈ దర్యాప్తులో ధృవకు అరవింద్ (అజయ్ ధీషన్) అనే వ్యక్తిపై అనుమానం కలుగుతుంది. అయితే, అరవింద్ వింత ప్రవర్తన, అతీంద్రియ శక్తులను ప్రదర్శించడం ధృవను విస్మయానికి గురి చేస్తుంది.
ఈ మిస్టరీలో అఖిల, శ్రుతి (బ్రిగిడా), రమ్య (దీప్శిఖ), వెన్నెల, మేఘల వంటి పాత్రల ప్రాధాన్యత ఏమిటి? అసలు ఈ దారుణమైన హత్యలకు కారణం ఎవరు? వాటి వెనుక ఉన్న అసలు ఉద్దేశ్యం ఏంటి? ఈ చిక్కుముడులన్నింటినీ ధృవ ఎలా ఛేదిస్తాడు? చివరికి హంతకుడిని ఎలా పట్టుకుంటాడు? అనేదే 'మార్గన్' కథాంశం.
Margan Review
సమీక్ష:
ఈ స్టోరీ సీఐడీ సీరియల్స్‌లో మనం చూసాం. ఇది తన లైఫ్ లో జరిగిన సంఘటనను స్ఫూర్తి‌గా తీసుకున్నట్లు ఉంది.
ఉత్కంఠ రేపే కథనం - ఊహించని మలుపులు..
'మార్గన్' కథనం ఒక నిర్దిష్ట ఫార్మాట్‌లో, రెగ్యులర్ సస్పెన్స్, క్రైమ్, థ్రిల్లర్ డ్రామా లాగానే సాగుతుంది.
సినిమా చూస్తున్నప్పుడు థ్రిల్ అని తెలుస్తుంది. అయితే, దర్శకుడు కథలోకి త్వరగా ప్రవేశించి, అనవసరమైన సాగతీత లేకుండా నేరుగా దర్యాప్తును ప్రారంభించాడు. మొదటి భాగమంతా అరవింద్ పాత్ర చుట్టూనే కథ తిరుగుతుంది, ఆడియెన్స్‌ను అతడిపై అనుమానం కలిగేలా చేస్తుంది. ఇంటర్వెల్ వరకు అందరి దృష్టి అరవింద్‌పైనే కేంద్రీకృతమై ఉంటుంది.
ఇలాంటి జానర్ చిత్రాలకు సాధారణంగా ఒక ఫార్ములా ఉంటుంది. మనం ఎవరిపై అనుమానం పడతామో, వారు అసలు హంతకులు కారు. మనం తేలికగా తీసుకునే పాత్రలే చివరికి షాకింగ్ ట్విస్ట్ ఇస్తాయి.
'మార్గన్' కూడా అదే ఫార్మాట్‌ను అనుసరించి ఒక అనూహ్యమైన మలుపును అందిస్తుంది. హంతకులు ఎవరో ప్రేక్షకులు దాదాపుగా ఊహించలేరు. మొదటి భాగం మొత్తం అరవింద్ పాత్ర చుట్టూ తిరుగుతుంది. ఇక రెండవ భాగంలో, ఆ పాత్ర చేసే విన్యాసాలు, దర్యాప్తులో అందించే సహాయం ఆకట్టుకుంటాయి.
ప్రీ-క్లైమాక్స్‌కు చేరుకునే కొద్దీ అసలైన ట్విస్టులు ఒక్కొక్కటిగా బయటపడతాయి. చివరికి ఎవరూ ఊహించని ఒక పాత్ర అసలు హంతకురాలని హీరో కనిపెడతాడు. ఇది పాత ఫార్మాట్ అయినప్పటికీ, రెండు గంటల నిడివిలో ఎంగేజింగ్‌గా కథనాన్ని నడిపించడంలో దర్శకుడు లియో జాన్ పాల్ విజయం సాధించాడని చెప్పొచ్చు.
సినిమా నిడివి తక్కువగా ఉండటం ఒక సానుకూల అంశం. పాటలు కావాలని జొప్పించలేదు. బ్యాక్‌గ్రౌండ్ మ్యూజిక్ (RR) అయితే ఉత్కంఠను రెట్టింపు చేస్తుంది. విజయ్ ఆంటోనీ ఈ చిత్రానికి తెరపైన, తెర వెనుక నిజమైన హీరో అని చెప్పొచ్చు. నిర్మాణ విలువలు, సంగీత విభాగం సహా అన్నింటినీ ఆయన సమర్థవంతంగా నిర్వహించారు.
నటీనటులు: విజయ్ ఆంటోనీ, అజయ్ ధీషన్ మెరుపులు
నటీనటుల పరంగా చూసుకుంటే, విజయ్ ఆంటోనీ ఇంటెన్స్ పోలీస్ ఆఫీసర్ పాత్రలో మెప్పించారు. ఎప్పటిలాగే ఆయన నిలకడైన అభినయంతో ఆకట్టుకున్నారు. అజయ్ ధీషన్ అయితే తన అద్భుతమైన నటనతో అందరినీ ఆశ్చర్యపరుస్తాడు. ఇతడు విలనా? సహాయ నటుడా? హీరోనా? అన్న స్థాయిలో అద్భుతమైన పర్ఫార్మెన్స్ ఇచ్చాడు. బ్రిగిడా పాత్రకు పెద్దగా స్కోప్ దక్కలేదు. దీప్శిఖ కూడా పర్వాలేదనిపిస్తుంది. వెన్నెల, మేఘ పాత్రధారులు బాగా నటించారు. మిగిలిన ఇతర పాత్రల్లో అందరూ తమ పరిధి మేరకు మెప్పించారు.
తీర్పు: ఒకసారి చూడదగ్గ ఎంగేజింగ్ థ్రిల్లర్. ఓటీటీలో రెగ్యులర్‌గా ఇలాంటి క్రైమ్, సస్పెన్స్, థ్రిల్లర్ చిత్రాలను చూసే వారికి 'మార్గన్' ఒక గొప్ప చిత్రంగా అనిపించకపోవచ్చు. కానీ ఇది ప్రేక్షకులను నిరాశపరచదు. తక్కువ నిడివితో, ఉత్కంఠభరితంగా సాగే ఈ థ్రిల్లర్ డ్రామాను ఒకసారి చూసి ఎంజాయ్ చేయొచ్చు.
